الآية الحادية عشر.

السلام عليكم ورحمة الله وبركاته .. عودة بعد انقطاع

هذي الآيه شفتها كثير في حياتي الأيام اللي راحت، لدرجة صرت اتخيل ايش يصير في حياتي من ورا الكواليس.. سبحانك يارب كيف له حكمة ولطف خفي يغيب عننا كثير. طبعا الآيه تنطبق على وضعنا في الحياة لمن نكون مزنوقين ومانعرف كيف بنطلع من وضع صعب وفجأة يجي التيسير والفرج! وانت ماتدري كيف جا ولا كيف تيسر لك بس المهم انه جا.. ونفس الشي طبعا تنطبق على جزاء المؤمنين في الجنة.

اللي خلاني أدون عن هالآيه موقف صار من كم شهر استأذنت اصحابه في نشره. اللي حصل انو هادية كانت عندهم رحلة عمره في الجامعة وماتيسرت لها أول مره.. وزعلت كثير وتضايقت واحنا كلنا زعلنا معاها خصوصا انها اول مره بتروح عمرة. وجلسنا ندعي لها وتيسر الموضوع مره ثانية الحمد لله انها تروح وفرحنا وكل شي بس فجأة برضو صار فيها عقبات في الطريق منعتها تروح. زعلت مره ثانية وزعلت اكثر اكثر وجلسنا نتكلم عن هالوضع وكيف ودها تروح كثير كثير يمكن اكثر من ساعة واحنا نتكلم وانا مره زعلانة عشانها بس الصدق اني مو قادرة اتفاعل كثير .. ليه ؟

لأن: اول مره تعسرت الروحة كلمتني ريم وقالت لي ايش رايك نجيب لها هدية تخرج تذكرة لمكة ! انا وافقت جدا وكنت مستعدة تماما لهالشيء.. وبعد كم دقيقة تقول لنا الجوهرة انو هي أصلا متفقة مع آلاء يدبرون لهم رحلة عمره كهدية تخرج لهادية.. وهادية مره مو عارفة شقاعد يصير من وراها ولاتدري انو ربي سخرانا انا وريم لها عشان نفكر لها بعمرة بدون ماتدري ولا تدري انو ربي سخر جوهرة وآلاء ورتبوا الموضوع قبلنا أنا وريم! طبعا أنا دارية بكل هالترتيبات وأنا اكلم هادية وهي زعلانة .. وكنت طول الوقت اقول في نفسي سبحان الله! لدرجة من جد من جد مو قادرة اتفاعل معاها لاني اعرف ان ربي يسر لها رحلة للعمرة افضل وبظروف افضل وشوفوا كييف سخر لها أربعة أشخاص جملة وحدة مستعدين يتكفلون بالموضوع! .. وكنت احيانا ما اعرف شقول واسكت وهي كانت مره متضايقة.. بس طول الوقت اقول في نفسي سبحانك يارب ما ألطفك ما آكرمك! فلا تعلم نفس ما أخفي لهم من قرة أعين. هادية زعلانة كانت ومررره ماكنت تدري بإيش يصير ورا الكواليس ولا كان عندها أي خبر كيف العمرة بتتدبر من غاممض علمه.. جلست أفكر في حالنا كثير.. كيف نزعل ونتضايق ونتعجل وإحنا علمنا قاااصر تماما .. مانعرف في هاللحظة كم من الامور اللي تتدبر ولا كم من الأمور اللي صرفها عنا بحكمته.. ولا نعرف في هاللحظة مين الشخص اللي يرسل الله على يده الفرج! نزعل ونتضايق نظن انها النهاية وهي مو النهاية أبد.. فيه حكيم خبير عليييم قاعد يدبر الأمور بأفضل طريقة نتخيلها ومانتخيلها .. بس خلق الانسان عجولا .. والله من هذاك الموقف وانا احسها رسالة من ربي انو شوفي كيف الامور تمشي، شوفي كيف الامور تتدبر من غير علم الشخص ومو بس كذا لا ربي يعوض بظروف احسن وطريقة أفضل.. فعلا ماحد يدري ايش اللي مخبيه لنا ربي من قرة أعين!

زعلان؟ متضايق ؟ منكسر ؟ تنتظر تعويض؟ اوكي لاتخاف واطمئن جدا جدا.. ورب العزة والجلال ما راح تضيع ولاراح يتركك ربي.. ماراح يتخلى عنك ابدا طالما انت تثق فيه وتطيعه.. فيه أحداث متعلقة بحياتك تدور خلفك، من غير علمك،، هذه الاحداث كفيلة بقلب الامور لصالحك حتى لو ما أدركت الحكمة مباشرة.. خلف علمك القاصر المحدود فيه حياة تدور وتترب عشانك انت.. خلف تفكيرك المحدود فيه مجريات تمشي وتترب عشان تحظى بأحسن حياة ممكن تخيلها..

سلمت لك نفسي يالله.. توكلت عليك.. r5