للتخلف عنوان ..

الكلام طويل ، اللي فاضي يقرا  ..

العنوان هو قسم التوعية والإرشاد في جامعة الامام ..

الأحداث بالتسلسل ..

قبل سنة من الآن أو أقل أو تزيد ..انا ونوف جالسين على كرسي الساعه 12 ، يعني باقي ربع ساعه ويفتح الباب .. قصدي السجن ..

كنت طالعة من ميد الارتفشل انتلجنس ، و كانت شنطتي برا القاعة ولمن جلست مع نوف جلست اشيك ع الشنطة لا يصير فيه شي انلطش ،
شيكت ع الجوال ، بس مسكته من جوا الشنطة بعد ، وكان مقفل !! بس بشوف هو موجود او لا ..

فجأة اسمع صوت من بعيد وقاعد يقرب : الجواااااااااال لو سمحتي الجوووووووووال

انا غبية كان فيني استعبط واقول ما معي جوال وفتشي الشنطة لو قدرتي ،
بس انو ارتعت احسها زي الشبح طلع لي ..يعني ما ادري الا و وحدة طلعت فجأة كذا..
قمت و بكل براءة طلعت الجوال وعطيتها ..قلبته وقالت اوووه كاميرا
( ولسان حالها يقول آآآه وناسة لقيت جوال كاميرا   )

قالت هيا بنا إلى مكتب التوعية ( الله وهالمكتب عاد ، مكتبين متزاحمين فيه مدري كم مخ متنح )
ونحن في طريقنا للمكتب المزعوم مرت بشلة وانا وراها وشافت معاهم جوال .. وقشته مع جوالي .. ولسان حالها يقول أيضا ما اكثر الصيدات لهذا اليوم .. ياعزتي لها بس وظيفتها انها تلقط الجوالات   ..
المهم دخلنا للمكتب والبنت اللي مسكوا جوالها قوية ولسانها طويل خذت جوالها بالقوة لكنه مو كاميراوانا الغبية الي مدري وش القصة قاعده ابتسم واوزع ابتسامات لأني اول مره اتعامل مع الشرذمه هذي
وما ادري انهم يحملون مخ من العصر الحجري ..

اللي جالسسة ع المكتب لمن درت ان معاي جوال كاميرا اشتغلت نظرات الاحتقار والازدراء والأسف على حالي  
 لأني صايعه وداشرة وما تربيت وجبت جوال كاميرا .. انا استغربت من النظرات شسويت طيب ؟ برجس على غفلة ؟
وكلهم يرمقوني بنظرات اووه جوال كاميرا ، كاني اول وحدة معاها جوال كاميرا..

انا بدت اعصاب النرفزة تشتغل عندي مع اني تعبااانة كنت مررره وفيني انفلونزا العالم كلهم ومالي خلقهم ..
قالت وحدة من الجالسين وهي تحمل شنطتها مستعدة للخروج : لاا جوال كاميرا هذا له اجراءات .. تدرين وش تقول الوكيلة ؟
قلت وماذا تقول بارك الله فيها ؟ قالت : انها تقول ان جوال الكاميرا كالرجل الغريب في الجامعة يعني أنتي بمثابة من أدخلت رجل غريب بالجامعة  خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ ههههههههههههههههههههههاي   
انا هنا ولا شعوريا فطست ضحك قدام كل ما يحتويه هذا المكتب  ،وبدأت نظرات الازدراء تزداد وبدأت شكوكهم بأني الفتاة المخيسة تزداد

معليش انا ما قدرت استحمل هالمنطق خخخخخخخخخخخخخخخخخخخ   والله اني قاعده اضحك لحالي الحين والكل نايم وصوتي عالي .. يعني ما تصورت ابدا ان فيه وحدة تحمل شهادة دكتوراة وعقلها يفكر بالطريقة هذي ..
:صورة جوال كاميرا لابس شماغ:

أردفت قائلة حاملة الشنطة التي لا أعرف لها اسماً : جوال الكاميرا فيه محضر ، ضحكت للمرة الثانية على التوالي   ..
قلت للي جالسة قدامي ( وهذي بالمناسبة أكرهها في الله كره عميييييييييييييييق ) : طيب عطيني شريحتي لو سمحتي

لاحظوا للحين اتكلم باحترام وأدب رغم ان النظرات منصبة علي وكاني وحدة جاية من الشارع
قالت : لااااااااااء مافيه شريحة !! الا لمن يتفتش ،
انا ما استوعبت وش تقول يعني لسا مخي ما يقدر يستوعب تخلف ابد   .قلت ايش ؟ قالت بنفتح الجوال ونشوف الاسماء ونشوف الرسائل وكلللل شي ، وربي وربي كان نفسي اصورها لمن قالت هالكلمة بطريقة مطعمة بالشك ،
إلهي اللي خلقني ما اكذب بكلمة وكأن اللي قدامها فاتحة شركة دعارة وهي كشفتها يعني ..
نرفزتني طريقتها لأبعد حد ، لكني حدثت نفسي انو اجل محترمة نفسة احسن  ،
مو عشانها عشاني انا بس  ..
قلت طيب الأرقام موجودة بالجهاز بس انا ابي شريحتي عشان انا عندي اختبارات ومشاريع ولازم اتصل بالبنات والدكاترة
قالت لااااااء ( مع الحفاظ على نبرة الصراخ والشك ) قلت ليه ؟ عطيني سبب واحد طيب ..
رفعت يدها الكريمة و وضعت اصبعها السبابة على مخها الفريد من نوعه قائلة : بس كذااااا

ياااااا إلهي انا هنا انصدمت فيه وحدة تكلم طالبة جامعية بالطريقة البزرانية هذي  

بعد هالحركة ماقدرت امسك نفسي قلت : نعم ؟! كيف كذا ؟ كيف قاعده تكلميني بهالطريقة ..الحين انا اكلمك بكل احترام تجين تردين علي هالرد  ؟ وش شايفتني قدامك تقولين لي بس كذا ؟
قالت: لا ماقلت بس كذا  ( توعية وإرشاد ديني وتكذب )
قلت سبحااان الله من قال اجل خيالك   ؟
قالت : خلااااص بس !الجوال بيتفتش ..قلت لها : نشوف  !!

طلعت ورحت البيت وانا احكي اختي بالسيارة واختي مو مصدقة بشاعة التعامل والتدخل في الخصوصيات..

رجعت لهم بعد هذاك اليوم قلت متى ينفتح جوالي ؟ قالت وكيلة التوعية مو موجودة ارجعي الساعه الفلانيةقلت اوكي ،
رجعت الساعة الفلانية الاخت طلعت ، قبل نهاية الدوام ..
رجعت من بكرا وعلى هالمرمطة لمدة اسبوع كامل ، لحد ماااطفشت وطفح الكيل ..
في هذه الأثناء عرفت ان زميلة لي (سجى الوحشة ) نفس الشي مسكوا جوالها كاميرا عند الباب والمقرف انها اخذته وماعندها نية تسكره ،لمن قالت لها سجى خير قفليه ..

المهم قلنا انا وسجى هذا الشي والمرمطة وكأننا عبيد لهم شي ما يصلح ومسألة تفتيش الجوال بدون اذن والتدخل في خصوصياتنا محد يرضى فيه ..احنا كبار وعاقلين بمافيه الكفاية حتى نعرف كيف نتصرف وإيش نسوي ..المهم رحنا انا وياها لشرذمة التوعية المبجلة ،

دخلنا وإذا بـ شخصة ذات شعر ” بوي ” بمعنى بوووي ..الشعر قصته = قصة الرجال ، ما ادري ما تعرف حديث التشبه ؟ والا كيف ؟

المهم قلت لها : لو سمحتي جوالاتنا وبطاقاتنا الجامعية عندكم وصار لنا اسبوع وراكم ..
قالت وش جوالاتكم كاميرا ؟اردفنا قائلات : (– لاعادت ع اللي علمك اردفنا ) ايوا كاميرا ،

امتعضت ذات القصة البوي كما امتعضت مثيلاتها في المكتب المحموم ..
قلت لها طيب .. كيف آلية المحضر ؟ قالت يتفتش الجوال هنا في مكتب التوعية تعطينا الرقم السري ونفتش كل شي بالجوال
قلت لها : ليش كل شي ؟ قالت : كذااا لازم نشوف الجوال وش فيه ( لاحد يضحك )

قلت : وانتي وش علاقتك باللي فيه ؟ تبين تشوفين الصور اللي متصورة بالجوال اوكي .. بس تشوفين المسجات والأشياء الثانية انتي مالك علاقة فيها ..ولا احد مسؤول يشوف هالأشياء غير اهلي ..

قالت لاااا لازم نشوف والا ليش تحيبون جوالات كاميرا ..

قلت اوكي احنا خالفنا قوانينكم الغبية ،، بس مايحق لك تتطفلين في خصوصياتي ..
تبين تفتشين الصور من عيوني ومن حقك لا اصير مصورة جامعتكم اللي كأنها جامعة هارفارد ..قالت لااااا ، هذي طريقتنا تبونا والا كيفكم ،
نقرا المسجات مسج مسج ، ونشوف الاسماء ومن هذا رقمه .. قلت خير ؟ وخصوصياتنا ؟ قالت ما فيه شي اسمه خصوصية ..

عند هذي الجملة بالذااااات تضمحل القيم والأخلاق الإسلامية وكأنها انقصت مع شعرها ..
قلت من قالك مافيه شي اسمه خصوصية ؟ لو مافيه شي اسمه خصوصية ما بنينا بيوت ولا بنينا أسوار ولا بنينا غرف ولا كان فيه اقفال ..
كان نعيش سوا .. وننام سوا ، اذا مافيه خصوصية ..

قالت لا ، تبين خذي فتشي جوالي ، قلت وش ابي فيه ؟ تحسبين انا زيك اخلاقي تسمح لي اطل بشيء ماهو لي ؟
واتطفل على حياتك اللي ما ارتبط فيها بادنى صلة ..والا تحسبين انا فاضية اقتحم خصوصيات الناس ؟

هي عصبت وقالت انتي من وين جبتي هالكلام ؟ قلت ما جبت شي من عندي هذا كلام نتعلمه وندرسه ونراه في كتب العلم ..

قالت انتم جبتوا الجوال تحملوا  .. وهذا مايجوز و حرام ، (تفتي بحكم انها فقيهه الظاهر )

قلت: وما يجوز القزع والتشبه بالرجال  
هي ما استوعبت هالشي وقعدت تطالع فيني ، وقالت الحين تجي وكيلة التوعية مدري مين الراجحي كلموها ..

قلت اوكي نكلمها ..جات الوكيلة اول شي كانت متفهمه جدا .. و وريتها فتاوى مضمونة عن حرمة الشيء اللي يسوونه وانه مايجوز لهم يقدمون سوء الظن ..
خصوصا ان مافيه تبليغ سيء ع الجوال او اي شي ،
علاوة على كذا الرسائل والاسماء ماهي من شغل احد ابد غير صاحب الرقم .

قالت لأن انتي مااتدرين وش نلاقي بجوالات البنات ؟ قلت وش تلاقين  ؟ 
قالت نلاقي فضائح ..قلت طيب احد بلغ وقال مع نوال فضيحة ؟ قالت لا ..
قلت طيب انا قلت لاتفتشون الصور اللي متصورة بكام الجوال ؟اذا قلت لا هذيك الساعة تقدرون تجبروني .. اما تتوقعين مني اصير غبية واعطيكم الجوال وتحققون معاي عن كل حرف
بينما اهلي اللي هم اهلي ما سووا لي هذي الحركة تسوونها انتم وانا برضى ؟

ليش يعني انا ماني شخص مستقل بذاتي ؟ انا ماعندي عقل يميز الصح او الخطأ ؟ وعطيتها اقتباسات من كتب دينية مطبوعة .. وقراتها ،
وقالت لحظة شوي ..دخلت لوكيلة شؤون الطالبات الملقبة بنورة المطلق
ورجعت لنا بشكل ثاني .. قالت لي : الحين انت وش تخربطين ، لا تقعدين تجيبين لي كلام ماله داعي ..

قلت انا ما اخربط انا اجيب لك كلام من الدين اللي تصلين صلاته وانا اصلي صلاته ، من الدين اللي تدرسه هالجامعة ..
سكتت وقالت : شوفي انا بجيب جوالاتكم بوديها للوكيلة ما راح نفتشها بالتوعية بتتفتش من الوكيلة بس ( طبعا الجوالات تتفتش مرتين ) لأني مشغولة عندي جولة ..

هههههههههههههههههههههههههههههههههههههههههههههههه مساحة للضحك بسبب كلمة جولة ..ما ادري وش يحسبون انفسهم  

ما ادري من الغبي هذا اللي موظفهم ومستحدث لجنة شغلتها كذا ..
بس ابي اعرف شهاداتهم الاكاديمية ؟ نفسي اعرف هم جامعيات والا جاهلات والا كيف ؟ وكيف توظفوا هنا ؟

المهم اخذوا الجوالات واتججهنا انا وسجى للمحاضرة ، ومن بكرا رحنا لمكتب الوكيلة ،
قلنا للسكرتيرة التي تحمل اسم  نبي نكلم الوكيلةقالت وش تبون فيها .. ماهي فاضية قلنا ننتظرها لمن تفضى ،
قالت لا ماراح تفضى ( وهي تنافخ طبعا )قلت : اسمها وكيلة شؤون الطالبات يعني من حقنا نقابلها ..

قالت لااا قولوا لي وش تيون ، قلت لا ماحنا قايلين نبي نكلمها هي .. قالت هي مشغولة ..انا حالفة الا اذب كلمة قلت : الوزير يقابل المواطنين، والوكيلة ماعندها وقت  .!!

قالت لا تتفلسفيييين علي انا مب فاضية / قلت لها ومن قالك اني فاضية لك اسااسا ؟انا عندي شغل وعندي محاضرات واختبارات وعندي شهادة محترمة اسعى وراها ..
(طبعا هي قاعدة ع المكتب اللي مافيه غير ورقتين وجمبها تلفون ما ادري وش الشغل اللي مصدقة عمرها فيه )
طلعنا من المكتب اللي زي قلته وقالت لنا وحدة من شؤون الطالبات إنو ترا فيه محضر بخصوص الجوال ..
( الشرطة متلطمة )

دخلت سجى اول شي ، وكانت الوكيلة تسوي المحضر لحالها ، الجندي الثاني غايب الظاهر ،
سجى بطبيعة الحال رفضت فتح الجوال والتطفل على الخصوصيات بغير وجه حق ..فالت سجى للوكيلة : اتصلي على ابوي واستأذني منه تفتحين الجوال ، قالت لا مو متصلة . لازم نفتحه

قالت لها مين اللي قال هالقرار ؟
قالت الوكيل .. الوكيل مين ؟ ابا الخيل .. ( طبعا ابا الخيل ما كان له غير اسبوعين جاي ما ادري متى مداه يتفضى لجوالات الكاميرا في مركز البنات  ،
او تحسب اننا اغبياء وما ندري ان هالمسخرة صايرة من زمااان قبل ما يتعين ابا الخيل اصلا )

قالت سجى خلاص انا بكلم الوكيل ، سكتت الوكيلة وسوت محضر بدون ما تفتح الجوال ..
سبحان الله !!

جا دوري بالمحضر من بكرا ، وكانت النكتة ,, طبعا وانا انتظر ادخل كانت السكرتيرة اياها جالسة ومكتفة من قلة الشغل ..
اخر شي توصلت له انها تمسك التلفون وتحجز موعد عند طبيب اسنان ، سكرت وتوصلت مره ثانية انها تدق على فلانة مدري مين
ويجيها خبر ان فلانة الأخرى حامل ، وتبدأ بالشهااااق وتبدأ بتقبل الخبر وتبدا علامات الصدمة عليها كأي امرأة سخيفة همها بالحياة مين حمل ومين ولد..
 

نادوا اسمي ودخلت وإذا بالمكتب وكيلة شؤون الطالبات ، ومعاها وحدة تكتب المحضر ( متاثرين بالمسلسلات المصرية )
واول ما جلست اخذت الجوال من الظرف وفتحته وقالت : يلاااا الرقم السري ..قلت لحظة !
كيف تفتحينه بدون إذني ؟ مو من حقك تفتحينه .

قالت : بلى من حقي .. ! قلت : والله لو فتحتيه بدون إذني راح اجيب حقوق الانسان والله !
عطيني قرار او ورقة رسمية تقول ان من حقك تفتحين جوال بنت ما رضت لك .

قالت : يعني شلون الحين ؟ ( — قلبت عامي ما ادري وش التمس عندها جوا مخها  .

قلت يعني جوالي ما يتفتش بنفس الطريقة اللي تفتشون فيها ..

قالت : خير ان شاء الله من متى هذا الكلام .
قلت من الوقت اللي اهلي وثقوا فيني وعطوني جوال وعطوني الثقة ومن الوقت اللي صرت فيه كبيرة ومسؤولة عن تصرفاتي ،
لدرجة ان اهلي بحياتهم ما فتشوا جوال احد منا  ..
تجين انتي تشككين في تربية اهلي وتتوقعين مني اني سيئة وتفتشين وتسألين من هذا ومن هذي..
اهلي ما سوها انتي تسوينها ليش.؟  وبأي حق ؟ ومين اللي سن هالقانون ؟ ومين اللي عطاك البجاحة حتى تتنقلين بين اشياء الناس وخصوصياتهم  ..
تبين تفتشين الصور فتشي تفتشين اشياء ثانية مالك علاقة ..

قالت : نعم لكن لازم نفتشه عشان المحضر ( وهي تصارخ تحسب اني في المريخ ما اسمعها )

قلت اكتبي بالمحضر اني رفضت وانا ابوي بيكلم الوكيل اللي تقولون انه يقول فتشوا الجوال ،
او عطيني التعميم اوا لقرار هذا وانا مستعدة اعطيك جوالي .. قالت مافيه تعميم ولا فيه قرار ..
قلت خلاص اجل ما تفتحينه وهو ممسوك مقفل ..
سكتت وتفاجئت من ردي .. شكلي خرعتها خخخخخخخخخخخخخخخخخخخخخخخخخ

قالت هاتي قااائمة بالأشياء اللي في جوالك ، قلت لها فيه صور بنت اختي . وفيه صور لبيتنا وفيه صور لأمي و و و و وفيه صور تصاميم ،
قالت ماذا تحتوي التصاميم ، قلت شلون ماذا تحتوي ؟ قالت هل فيها صور نسااااء ؟قلت لاايوجد صور نسااااء ،
قلت ايوا وفيه قصيدة :] قالت مايهم ، قلت انتي قلتي تبين قائمة ..المهم قالت وقعي هنا ومعرف ايش ..

وقعت وانا كلي برود ، ورباطة جأش :]
طبعا كل هذا و الوكيلة ساكته وتطالع بس وتكتب في ورق وتطمس وترجع تكتب .. :]

قالت هامسةً كاتبة المحضر: نحن نعطيكم متسع من الحديث لتعبرون ونسمع لكم ..
قلت متسع من الحديث والا الصراخ ؟ انا مابي اتعامل بهالطريقة ان كان جوالي يتفتش يتفتش بحضرة ولي امري ..
سكتت وقالت اكتب ياني اتعهد ان لااحضره مره اخرىطلعت وانتهى الموضوع وخلص الترم ، ورحت بجيب الجوال بنهاية الترم ،
مالقيت ولا وحدة بالمكتبراح ترم بعده وانا كل شوي اروح اقول ابي جوالي ، تعالي الساعة الفلانية تعالي الوقت الفلاني لمن تجي فلانة ..
لمن حااامت كبدي منهم وخلص الترم اللي راح ولاعاد فكرت اروح  ..

الاسبوع اللي راح نزلوا اعلانات بكل مكان وبالسايت حق القسم انو نوال روحي لشؤون الطالبات :p

رحت قلت لها نعم   ؟ قالت ووشو ؟ قلت انتم مناديني ؟ قالت وش اسمك قلت نوال .. قالت وش قضيتك ..خخخخخخخخخخخخخخخخخخخخخخخخخخخخخخخخخخ  ..
تخيلت ان فيه قاضي ومحكمة ورفعت الجلسة .. يا للخزي على هالتصرفات بسسس .
قلت لها قضية وشو ؟! قالت يعني جوال والا ايش ؟ قلت ايوا جوال كاميرا وبكل فخر ..

راحت وجابت معاها جوالي حبيس الأدراج النتنة لمدة سنة كاااملة .. و وقعتني استلام .. ويمكن يغيبوني اسبوع عقابا :]
طبعا كان فيه ميدالية دبدوب شايلينها قلت وينها   ؟
قالت ذوات ارواح خخخخخخخخخخخخخخخخخخخخخخخخخخخخخخخخخخخخخخخخخخخخخخخخخ
بالمناسبة وانا رايحة اوقع استلام الجوال صدف ورأيت السكرتيرة اياها على نففففس حطة يدي من سنة  

جالسة بالمكتب وامامها تلفون من دون اوراق ومتكتفة الأيدي .. ربما تنتظر خبر ولادة احدهن  

ياااااا الله يا جوالي ولكم بااااااااااك ،
اشتقت للكونتاكتس واشتقت لمسجات البنات فيه واااااااااااءكلها سوالف سوالف وهباااااااالة .. وربي وانا قرا كنت شوي واصيح من الذكريات ..

الخلاصة : دايم دافع عن رأيك طالما انت تراه صحيح ، ولا تخلي اللي يتلبسون باسم الدين انهم يفرضون قوتهم المزيفه ..

كل انسان متعلم ويقدر يستنبط ويعرف وش الصح والغلط فلا تخلون احد يملي عليكم شروطه ..

خصوصيتك هي شخصيتك ، لا تخليها عرضة لأحد ..

احترم الناس لنفسك اولا .. ولو شفتهم ما يستاهلون الاحترام عاملهم بالطريقة اللي تناسبهم  مشاهدات :

كل بنت في جامعتنا التوعية يتوقعون انها تغازل ( وبالضبط هذا اللفظ السوقي ) ، الا من رحم اللهاي بنت فهي سيئة مالم يثبت انها كويسة ..

لمن يفتشون الجوال كما شفت قدااام عيني وسمعت من صديقاتي يفتحون الاسماء وتمر اسم اسم ولمن تمر على اسم رجال ( كان العائلة مافيها خوال واعمام واخوان )
تسأل هذا مين ؟ولمن تشوف رقم سواقين تقول كل هذول سواقين ؟ ترا بدق عليهم واتأكد .. ( بجاحة  )

يفتحون المسجات ويقرون مسج مسج.. وكما صار لسارة صاحبتي قرت مسجات عاطفية ( من اللي ينعمل لها فورورد ) من نفس الاسم ( الاسم بنت ) قامت شكت ودقت ع البنت وقفلت بوجهها . ( متخيلين )

وحدة من صديقاتي قالت لهم ترا هذا الفولدر فيه مسجات من زوجي لاتفتحينه تقول تركت كل شي وراحت تفتحه ،
لدرجة انها تتطفل وتسأل ليش راسل هالمسج ؟ ليش هالشي هنا ؟زوجها وهي حرة هي واياه انتي شدخلك ياقليلة الأدب ..

طبعا انا بتعب من الكلام بهالموضوع .. لكن الرفض كان لبجاحة تعاملهم وكأنك بنت ما تربيني وانهم هم الملائكة المنزهين ..

وشكوكهم في بنات الناس تعدت المعقول ومشاكلهم مافي اكثر منها في الجامعة ،
وهم يمشون مرره فرحانين بانفسهم ويحسبون انهم الصح وانهم اللي بينقذ المجتمع من فساد الفتيات ..
ما اقول الا الله يوريهم اللي سووه في بنات الناس في انفسهم ( لأنهم كم مره ظلموا بنت ودقوا على اهلها واتهموها باشياء مو كويسة وسببوا مشاكل مع الاهل بعدين اكتشفوا انهم فاهمين غلط )

اللهم لاتعمي قلوبنا وابصارنا عن الحق ،

اللهم انزع مايسمى بالعادات والتقاليد و ليبقى الدين والدين فقط ..

اللهم لاتولينا جهلة ولا متحجرين لايفقهون من امور الدنيا الجديدة شيئا ..

اللهم يجي يوم واشوف قسم التوعية مقفل ياكريييييييييم  .. 

مخرج :

مستحيل نتطور والمجتمع مليان بالأشكال هذي ، اللي مخليه قضايا العالم تتوقف عند جوال الكاميرا ..
واللي تحسب ان جوال الكاميرا هو مفتاح الفساد ، واللي تحسب ان البلوتوث هو بلاء الامة الإسلامية جمعاء ..
واللي مصدقة إنو سياسة رفعة الخشم هي الوسيلة للإصلاح ..