اترك أثر ..

من كم شهر نور اعطتني هالمقطع ، ولحد اليوم ما مليت من كثر ما اشوفه المقطع صادق ، واحاسيسه من القلب ، وهدفه جدا حلو، ..ونشوفه بحياتنا كثير.. قد ما تعطي غالبا قد ما تاخذ .. كيف ممكن الأشياء الصغيييرة تتحول لأشياء أجمل ،مجرد منديل وفر للبنت وجدتها طعام يسد جوعهم، الأكيد ان البنت اعطته بدافع المحبة والطيبة وما كانت تحسب لهالشيء حساب ..

ايش صار لو احسنّا للي حوالينا بدون ما نفكر بالمردود ؟ لو ركزنا على الخدمات اللي ما نبي فيها مقابل ولا حتى “شكراً “..مو بس راح نغير اشياء في الناس اللي نقدم لها الخدمة ، اكيد انو راح تتغير حياتنا احنا مقابل الاشياء اللي نعملها ..راح تضيف أثر ايجابي صغير او كبير عاجل او اجل ، واضح أو خفي ..هذا المبدأ يخليني افكر بالأثر اللي اتركه بحياة احد ما ، ايجابي او سلبي .ولو سلبي هل كان بإرادتي اني اترك له هالأثر او انجبرت عليه ؟لو كان ايجابي ايش كانت دوافعي عشان اسوي هالشيء الايجابي ؟ افكر بالناس اللي تركوا في حياتي اثر ما ينمحي مهما صار ..

افكر باستاذاتي ، بدكاترتي ، بأفكارهم اللي يقولونها وكيف فتحت مخي !وكيف علموني ..افكر بصديقاتي وكيف من كلمة وحدة اقدر اتجاوز محنة ،افكر باهلي بتصرفاتنا الدقيقة مع بعض ، بتفاصيل حياتنا وكيف ممكن تترك اثر .. افكر بجود الصغيرة كيف ممكن تقلب يومي فوق تحت بضحكة بس ! افكر بالناس اللي التقيتها من النت ، كيف شخص ما اعرف منه الا حروفه ممكن يترك فيني اثر طويل ؟

ترك الأثر مسألة على قد ماهي عميقة على قد ماهي بسيطة ومن القلب.. كل الأقعال اللي تخرج من القلب تصل للقلب مباشرة .. وكل الأفعال الصادقة تجد لها مكانا في نفس المتلقي .. شكرا لكم كلم ، حتى اللي يكرهوني :]، متأكدة انكم غيرتوا شيء بسيط فيني وهالاشياء البسيطة اجتمعت وكونتني .. منها ايجابية وكثير منها سلبية شكرا لأنكم بكلمة ماحسبتوا لها حساب تغيرت فيني اشياء كثيرة برد – بابتسامه – بتعقيب – بالمتابعة .. تركتوا اثر ..

مخرج : لا تتواني بيوم عن تقديم اي شي تقدر تسويه ، راح يترك اثر في حياة شخص ما وهالأثر بيرتد لك ولو بعد حين .. لا تتجاهل اي شي ولو كان بسيط ، لا تتجاهل ابتسامتك لأي احد في الشارع ممكن يكون مر بيوم عصيب وانت خففت عليه هالشيء ، لا تترد تساعد احد في اي حاجة يمكن كان يواجه صعوبة وانت جيت وخففت عنه الحمل ، قدم كل ماعندك ، بتشوف كل اللي عند الناس ..