الآية الأولى.

بسم الله الرحمن الرحيم.. كل القرآن جميل .. وكللله نحبه.. كله كله .. لكن بعضنا يحب بعض السور بشدة عظيمة.. انا مثلا مرتبطة عاطفيا وحياتيا بسورة الكهف بشكل ما حد يتصوره!! احس هالسورة دايمن تاخذ بيدي لليقين..واتمنى انها تآنسني في قبري مع كثير من السور اللي احبها.. المهم قبل كم يوم كنت ارتب غرفتي ودايمن لمن ارتب عندي بلاي لست مخصصة للترتيب :] من ضمن اللست سورة الكهف طبعا .. مرت الآية : ولا تطع من أغفلنا قلبه عن ذكرنا واتبع هواه.. وكان آمره فرطا.. هي طبعا دايمن تمر بس هالمرة غير وما ادري ليه هالمرة غير!! حسيت بعظمة هذي الآية في حياتنا .. حسيتها ترسم لنا طريق واضح جدا جدا جدا في تعاملنا مع الناس وارائهم.. دايمن لمن نمر بفترة لازم نتخذ قرار صعب نبدا نفكر بالاستشارة،، هنا.. في هالوضع مثلا.. في هالوضع بالذات.. تبرز قيمة الآية في حياتنا.. مين تستشير؟ تسمع رأي مين ؟ لمين تعطي السلطة لابداء رأيه في شؤن حياتك حتى الخاصة؟ لمين تسمع من الناس وايش الرأي اللي تسمعه وايش اللي تتركه؟!! سبحان الله كلام واضح وسهل وعملي: اللي قلبه مو متعلق بالله.. اللي روحه مو مغتنية بذكر الله.. اللي حياته وتفكيره مو مرتبط بالله ولابحب الله.. هذا الشخص، هذا البعيد عن ربه.. لا تسمع له ! هذا الشخص اللي يمر عليه الذكر الطيب ولا يلين قلبه.. هذا الشخص اللي يخطئ في حق ربه وحق خلق ربه وما يتوب ولا يعرف طريق الرجعة.. هذا الشخص.. في رأيه ممكن يكون دمارك!! الشخص اللي تعدى حدود الله ويكابر! هذا طبيعي انه يتعدى حدوده في كل شيء، فكيف تثق فيه!! الشخص اللي ما يراعي ربه الشخص اللي ما يضيق صدره اذا اذنب لا تعطيه حق ابداء الرأي في آي شي لك.. ولو طعت كلام هالاشخاص راح يكون امرك فرطا .. زيه بالضبط..

في هالاية اشوف قاعدة ذهبية لطريقة تعاملنا مع الناس، واراء الناس.. لمين نسمع؟ ومين نقصده ونستشيره ؟ مو بالضرورة نقصد الملتحي او الشيخ او مدري مين.. فقط اسآل اللي قلبه دايم مع الله ، اللي مع كل حركة او سكون يفكر بالله ولو اخطأ، تاب.. ولو اخطأ مره ثانية تاب بعد! اسأل الشخص اللي يعرف ربي،، وابعد عن الشخص الغافل لانه برأيه ما راح يراعي ربي! وبتضيع !! بتضيع منك الفرص .. وبتضيع منك البركة.. وبيضيع منك كل شي وبيصير امرك فرطا..

اول ما سمعت الآية سبحانك ربي!! مباشرة تذكرت مقال لشخص لاحظته يهاجم المهتمين بنهضة الامهة.. وكان كاتب مقال عن التعليم عندنا ، وحاط مقترحات لتغيير المناهج وانا اقرا اتذكر ان وجهي تغيرت معالمه! غضبت او انقهرت مدري وش الشعور لكن اتذكر زييين انو كشيت من المقال ومن الرأي.. كنت اشوف فيه مغالطات كثيرة وتعديات على اشياء مثل تعليم القرآن والتجويد.. قلت مابي احكم وهو هدفه التطوير ويمكن اخطأ.. لكني برضو تذكرت له مقالة طويلة فيها استنقاص ( مو انتقاد ) لجهد احد المجددين.. وقارنت نتاج هالكاتب بغيره من اللي يذمهم و واقف ضدهم مالقيت له شيئ اعتبره يشرف .. لقيت له مسلسل هابط.. مثل هذا الشخص (لو كنت وزير تعليم) تقدر تآتمنه على مناهج تعليم لاجيال قادمه ؟ ومثل هذا الشخص تقدر تآتمنه على خطوات حياتك؟ تقدر تسمع رأيه ؟ عن نفسي ما اقدر صراحة !!

فعلا فعلا ولا تطع من اغفلنا قلبه عن ذكرنا واتبع هواه،، من اليوم وطالع خلونا نعرف لمين نسمع وبمين نثق!

* امس كنت اكتب اكتب وفجأة تسكرت الكهرباء عشان المطر :/ فمعذره للتآخير.
* هذي أول تدوينة من جهازي الجديد :] .. بركتك يالله بركتك .. r5