الآية التاسعة.

السلام عليكم ورحمة الله وبركاته.. كيفكم أصدقائي ؟ :]

* هالمرة ما سمعت الآية وانا مشغلة أي سورة. كنت اقرأ كتاب مراد هوفمان : الإسلام كما يراه ألماني مسلم. ومرت هالآية وصار وجهي ” 😥 ” من مدة وانا مهتمة بالارض! مو فلسفة ولا مثالية زايدة ! لكني من جد احس احنا متوقعين الخلافة في الارض مرتبطة بالصلاة والصيام والعبادات هذي وبس.. بينما نغفل بشكل كبير عن انو اصغر الحركات واصغر السكنات ممكن تكون عامل اصلاح او افساد بالارض ! انك تصلي دايمن وبانتظام لكنك ماتهتم لنظافة بيتك / شارعك او تصوم حتى النوافل لكن ماتهتم لو شفت علبة عصير منكبة بالارض ومافكرت تشيلها وا شفت احد قدامك قاعد يرميها لكن ما فكرت توقفه!. انك تصلي الفجر بوقتها وبالمسجد لكنك تسرف باستخدام الكهرباء وتسرف في استخدام الموية و تسرف في استخدام مصادر الأرض بحكم انها متوفرة.. في هالحالات ما اعتقد يكون الواحد منا حقق معنى الخلافة في الارض باسمى معانيها.. مشكلتنا والله مره عميقة! مو بس مشكلتنا انو لمن يصير عدد اللي يصلون الفجر زي العصر .. لكن مشكلتنا انو اللي يصلون ماتربطهم صلاتهم بالله فعلا !! وما تربطهم عبادتهم بالله.. تخيل انه لو طلعت من غرفتك وانت ما تحتاج الكهرباء وسكرتها انت كذا تؤجر ! لمن تستخدم الموية وتفتح الصنبور على المينمم مو تخليه مفتوح بعنف تؤجر! انك تشوف سيجارة مرمية بالارض ولسا مشتغلة وتشيلها وتطفيها وتنظف المكان تؤجر اجر عظيم .. لانك تصلح.. ولان حياتك بادق التفاصيل مربوطة بالله ! اتحدى فيه حياة اجمل من كذا !

انك تشارك في ساعة الارض او يوم الارض وتكون نيتك من باب الاصلاح في الارض انت بالتأكيد مأجور! انك تكون شخص مهتم بالبيئة يعني انت مصلح في هالارض مو مفسد يعني انت مأجور! انك تحاول في أهلك يستغنون عن البلاستيك ولو كنت صاحب قرار تمنع تواجده وتستعيض عنه.. او تجمع البلاستيك في كرتون وتوديه لمصانع اعادة التدوير انت بالتأكيد مأجور طالما نيتك خالصة لله والاصلاح في ارضه – اللي هي مهتمنا الاساسية من الوجود هنا -. طبعا كلنا نعرف خطر البلاستيك على البيئة ! البلاستيك مادة ماتتحلل زي بقية النفايات.. حتى لو احرقتها بتظل متكومة على نفسها كذا ويصير لونها اسود.. وبالتالي بتظل عالة ع البيئة.. شوفوا كيف الارض الحين ! شوفوا كيف الفساد  ( طبعا فساد بيئي تتضمنه هالآية- لان كثير نظرتهم للفساد يعني فساد اخلاقي و و و ) الغلاف الجوي والاحتباس الحراري وانقراض بعض الحيوانات.. هذا غير نفاذ مريع في بعض المصادر .. والاحصائيات شيء يخوف جدا جدا مدري كيف بنعيش لو استمرينا على هالاستهلاك المريع..

الشيء الجميل في الآية رحمة الله وحنانه فينا! .. لعلهم يرجعون :”( يعني هذي نذر عشان ننتبه لحياتنا وكيف عايشينها وان الاسلام مو بس صلاة وصيام وزكاة و و و.. فظهور هالفساد اللي هو بسببنا حتى نذوق بعض ( بس بعض ) من الحاجات السيئة اللي نسويها ع الارض ولانهتم.. نذوق بعض من اللي نرميه ورانا في الارض ونمشي وكأن الأمر مايعنينا. نظن اننا نحاسب على الصلاة والصيام وبس ؟ لا والله كل شيء بنحاسب عليه ومنها هالفساد اللي شاركنا فيه في الأرض..

* قبل امس كنت طالعة انا وهدى اختي :] المهم انا وهدى خلصنا اغراضنا وطلعنا وقعدنا ننتظر السواق . الا اسمع هدى تقول بصوت عالي: عيب مررره عيب . لمن لفيت الا تقولي شوفي هذا رمى السيجارة وهي لسا مولعة وراح وتركها ولا كأن الامر يعنيه وتأشر لي عليه انا قعدت اطالعه وماني مصدقة ان فيه شخص بهالبرود واللامبالاة يوسخ المكان ويمشي.. والمشكلة الشاب هذا متضبط ومره معتني بشكله جدددددددا. الصراحة انا ما قدرت استحمل.. الاسلام موقف وهذا التصرف مو من الاسلام.. احس اني بدون شعور رحت الحقه :] لمن انتبه ان فيه احد يناديه ويقول لو سمحت لف علي يعني: خير ؟ :]  قلت لو سمحت انت رميت سيجارة ماطفيتها + لو متطفية مره مو مكانها الشارع وعند كل الناس ! فممكن تجي تشيلها؟ طبعا ما كأني اتكلم وبنص الكلام لف وخلاني.. هذا وانا صوتي واطي ومره ما احد سمع شيء!  ياللأسى بس ! رجعت اقول لهدى ع الموقف وطلعنا منديل وشلناها احنا والله يأجرنا ويهديه ويهدي امثاله. حرام وقسم حرام هذي الارض مو حقتنا حقت ربي عيب ٫ حرام نخربها كذا :”( ! ممكن نوعد بعض نحافظ على مصادرها ونعتني فيها زي ما نتعتني بانفسنا ؟

وهذا كلام جميل من مراد هوفمان في ذات الكتاب: ” العالم ليس متروكا للانسان ليستغله استغلالا سيئا. وعلاوة على ذلك فإن السلوك الذي يحافظ على البيئة هو نوع من التقوى.. ” ولا تفسدوا في الارض بعد اصلاحها ” الاعراف:٥٦ .. لا يدعو القرآن الكريم إلى جعل العالم(تابعا)، بل يقر للناس التمتع به بشكل مسؤول و أمين عليه. كما تنبأ القرآن الكريم بان السلوك الانساني الخاطئ على الارض والبحر سوف يُحدث ضررا، ويحذر من نتائج ملموسة نتيجة سوء استخدام مصادرها “