الآية الثانية.

السلام عليكم ورحمة الله وبركاته.
من فترة تمر علي هالآية! واقرا كثير في الاعجاز العلمي في هذي الآية واللي تليها عن مراحل خلق الإنسان. ياسبحان الله! ليه طين؟ ليه بالذات طين؟ ليه مو خشب مثلا! ليه مو أي شي ثاني من المواد الطبيعية؟ ليه طين؟ ليه ليه ! انا ؤمن إيمان تام إنو دائما ربي بيعلمنا من المعاني المستترة أكثر من المعاني الظاهرة.. وانه مافيه شي اسمه صدفة اطلاقا.. كل شي يحدث لسبب نعلمه او ما نعلمه،، اؤمن انو خلقنا جاي في احسن حالاته وانو المواد اللي احنا انخلقنا منها هي اللي المواد المناسبة تماما.. بس ليه طين ؟ ربي يقدر يخلقنا باي خلق وبيكون رائع مهما كان.. بس ليه طين ؟ اكيد لازم نتعلم اشياء معنوية كوننا مخلوقين من طين! وارجع اقول ليه طين ؟ مابي اسأل عن الاسباب العلمية عرفوها قبلي.. ليه طين ؟ ليه من بين كل المواد طين ؟

الطين! الطين المادة اللي تتشكل ويعاد تشكيلها.. المادة اللي تاخذ شكل القالب.. الطين اللي من الارض ولها يعود.. الطين.. صح صح الطين اللي يتغير.. الخشب ما يتغير ماينعجن ما يتشكل مو زي الطين مو زي الصلصال ! الطين لان احنا قابلين للتغير.. قابلين لان ناخذ شكل القالب اللي ننحط فيه.. قابلين تماما للعجن والتغيير.. سبحانك ربي خلقتنا باحسن خلق معنوي ايضا.. لو احنا من خشب بناخذ صفات المادة وما بنقدر نتغير ولا نغير! لو احنا اي شي ثاني ما بنكون زي لو احنا من طين.. من طين لاننا لازم نغير ولاننا لازم دايما نغير في الناس للاحسن ونوجد افضل القوالب ونتشكل فيها.. من طين لاننا كل ماضعفنا كمسلمين نحتاج لاعادة تشكيل ،وعجن في الافكار والمعتقدات والتصرفات.. من طين لاننا لازم نكون مهتمين بالتغيير للاحسن.. من طين لاننا لازم نتغير حتى لو صعبت المسألة لكنها بالنهاية ممكنة مادمنا مخلوقين من طين.. من طين عشان نتغير ونغير وعشان تكون عملية التغيير ممكنة ولو كانت صعبة.. من طين عشان تشوف انت في اي قالب؟ في القالب السطحي او العميق؟ انت اختار القالب لنفسك! او انت اصنعه.. تقدر تكون في قالب اعتيادي زيك زي ١٠٠٠ غيرك وتقدر تكون بقالب مميز لك.. تقدر تدعو الناس لقالبك وتغير فيهم.. في طبائعهم.. تشكلهم وتعجنهم للافضل.. ليه طين؟ عشان نغير ونتغير!

ليه طين ؟ عشان الطين من الارض .. قريب من الارض.. عشان تتذكر يا انسان انه مهما وصلت ومهما عملت راح تظل ولاشيء! عشان ما تبعد عن الارض وما تتكبر . عشان تتذكر بكل مرة تشوف نفسك احسن من الكل انه انت من طين.. نفس الطين اللي انخلق منه غيرك اللي تشوفك احسن منهم منزلة ومكانة.. من طين لاننا مهما تكبرنا ومهما اعتزينا باشياء عابرة راح نظل احنا احنا .. من طين .. ضعيفين وقوتنا بالله.. قوتنا بالخالق مو بالمنصب ولا بالجمال ولا بالنسب ولا الحسب ولا المال.. انت من طين من طين.. من طين تواضع وتغير و غيّر للاحسن.. انت من طين.. عرفت ليه انت من طين ؟!