الآية السابعة.

:yy:

انا اؤمن بشدة انو مافي شي اسمه صدفة.. ممكن يكون فيه شي irrelevant.. شي ماله علاقة بشيء.. لكن صدفة مستحيل ! كل شي له سبب وكل شي صغير ولو اصغر شي له سبب وغاية.. كنت ع الجهاز من قبل كم يوم واختار سورة اسمعها وانا اشتغل.  اخترت سورة النحل. ومرت علي هالآية.. ومجددا كف ! كف معنوي .. آيه ثانية تعلمني كيف اطور ذاتي وتقودني للكيفية. بعد مدة من نفس اليوم كنت بالمطبخ وامي مشغلة اذاعة القرآن ما مداني ادخل المطبخ الا تجي هالآية :|.. معليش ما اقدر اقول انها صدفة ! سبحان الله انا اعتقد وبعنف انها رسالة من ربي.. لاني بنفس الايام اللي راحت كنت حابة اتعلم شغلة ومره مستصعبتها.. واحس اني مع قلة المزوالة لمهارة ما فقدت مهارتي فيها ويمكن حبي لها! فكنت من جد متضايقة من هالشي فيني.. حسيت اني ما اعرف خلاص.. بنفس هالفترة ربي ارسل لي رسالة باني اسمع هالاية مرتين بنفس اليوم.. صح صح يا انا ويا انت ! مافيه احد متعلم.. شايف كيف بالقرآن كيف ياخذ بيدنا ويقول لنا انو ماحد يولد متعلم .. وربي خلقنا مانعرف شي وتبدا مرحلة التعلم شوي شوي لمن ترتفع مهاراتك .. الله خلقنا وحصيلتنا العلمية تقريبا صفر.. ومع الوقت نندهش من كمية الاشياء اللي صرنا نعرفها.. الله خلقنا مو عارفين شي لكنه اعطانا سمع وبصر وفؤاد.. اقوى الوسائل في التعلم.. واحنا نملكها ونقول مانعرف! كم شخص شفناه معاق او اعمى ومع كذا سووا انجازات فظيعه .. واحنا عندنا كل هالوسائل الثلاثة الحمد لله ونقول مانعرف! او مايصير! فيه اشياء احنا مالازم نتخلى عنها بسهولة.. صحيح الناس هوايات وقدرات مختلفة ممكن انا احب شغله واتقنها لكني في شغله ثانية لايمكن اكون منجذبة لها.. لكن احنا لازم نتمسك بتعلم الحاجات اللي نحبها ونهواها.. وما نوقف عند اول صعوبة لانه يانفس تذكري! انولدتي وماتعرفين حاجة.. والحين وين وصلتي ؟ كله بفضل الله .. بفضل ما اعطانا الله٫هذا الرب الرحيم الكريم.. مالي عذر اقول ما اعرف دايما.. مالي عذر لانه اقدر اتعلم زي ماتعلمت من اول.. اللي احتاجه انه اصبر على نفسي واقول دايما: والله اخرجكم من بطون امهاتكم لاتعلمون شيئا.. وتذكري انه هذا من فضل الله.. واسأليه من فضله وبركاته.. وبتوصلين.. وبتوصل انت.. سمعك وبصرك وفؤادك هم سر تغييرك.. هم سر معرفتك .. هم طريقة تطويرك،، هم من نعم ربي اللي لو ما استغليتها بشكل ايجابي راح تضيع وراح توديك لطريق مرعب! تبصر واقرأ.. اقرأ الكتب والناس واقرأ ايات الله في كونه .. اقرأ كل شي وتعلم.. اسمع واقرا ( واعقل ) ..

راح تنبهر من كمية دروس تطوير الذات في القرآن.. صدقت ياحبيبي يامحمد عليك أفضل الصلاة والسلام لمن قلت: ” تَرَكْتُ فِيكُمْ أَمْرَيْنِ لَنْ تَضِلُّوا مَا تَمَسَّكْتُمْ بِهِمَا كِتَابَ اللَّهِ وَسُنَّةَ نَبِيِّهِ “