الحياة اختيارات –1-

بسم الله الرحمن الرحيم. السلام عليكم ورحمة الله وبركاته. من الجميل جدا والإبداعي جدا والخطير جدا، والواو جدا إنو ربي وهبنا العقل والاختيار، تقدر تختار معظم الأشياء في الحياة، قراراتك تختارها، ولو اضطريت عليها تقدر بعدين تختار كيف تتعامل معاها، إما تغضب أو ترضى وتطمح للأفضل مع جهدك، والرضا أكبر نعمة، أكبر من نعمة الحظ الجيد : ) . تقدر تعيش سنتين في حزن وغضب على العالم من حولك لانك انجرحت وانهنت ولأنو تمت خيانك مع انو انت ما تستحق، وتقدر بنفس الوقت انك تخلي من هالحادثة السيئة وسيلة عشان تترفع عن الامور السيئة والاشخاص السيئين حولنا. عادي تحزن عادي تتضايق بس المو عادي انك تخليه المؤثر الاول والأخير على حياتك ( للأسف يعني انا اخترت الخيار الأول :] لكن ربي بعدها اهداني حياة جميلة جدا جدا بالنسيان وادركت فعلا اني above that – شكرا ربي! شكرا لأنك فعلا تحوطنا بعنايتك اللتي لاندركها).

تقدر تتقبل مهارتك الغير عالية في شيء ما وتزعل من نفسك وتغبط غيرك على قدراتهم الكويسة. وتقدر بعد تطور من نفسك كثير كثير وتكتشف الشيء اللي انت قادر تبدع فيه وتصير من الاشخاص اللي الناس تطمح تصير زيهم. في الاختيار الأول محد متضرر غيرك! إنت بتزعل ويرتفع ضغطك وتعيش حياة بيئسة وتنعدم ثقتك بنفسك. في الاختيار الثاني راح يكون لك هدف، راح تمشي عشان تحقق هالهدف، راح توصل للهدف بإذن الله تعالى، راح تفيد نفسك وتفيد مجتمعك. أيهم أحسن ؟ وأيهم أسهل ؟ انك تعيش حياة بيئسة بدون جهد ؟ او تعيش حياة سعيدة بجهد؟

حياتنا وكل شيء فيها متعلق بخياراتنا. بالقرارات اللي ناخذها او الظروف اللي تنفرض علينا وبالخيارات اللي نختارها في التعامل مع الامور، وقلب كفة الميزان لصالحنا. الأمور السيئة راح تصير ولا بد لكن ميزة الاختيار ان لك الحرية المطلقة في اختيار ردة فعلك طويلة المدى : ).

راح أتكلم عن خياراتي الكويسة و الفاشلة، الخيارات اللي ساهمت في قلب حياتي ونفسيتي رأسا على عقب سواء بشكل ايجابي او سلبي. الخيارات اللي سهلت علي التعامل مع اللي حولي، وسهلت علي تقبل الضغوطات وتحويلها لشيء انتاجي مو انفجاري. الخيارات اللي ظنيت انها سيئة وبعد مدة اكتشفت انو فعلا وعسى ان تكرهوا شيئا وهو خير لكم. الخيارات اللي اتخذتها من غير وعي وتبين لي بعدين ان العناية الالهية كانت تحوطني ودلتني على الاختيار هذا اللي لولاه ما كنت عرفت اشياء كثيرة كويسة وناس كثيرة كويسة، كل الاختيارات الجميلة و القبيحة راح أحاول أحصرها مهما كنت سخيفة او كبيرة – ع الاقل بالنسبة لي –

– كم (ضغط) عندك؟ – :

محد منا معصوم من مقابلة او الاحتكاك بناس يرفعون الضغط. ( يمكن احنا نفسنا نكون مصدر رفع ضغط لأحد :] ) لكن باختياري ارفع ضغطي فعلا وصحتي تروح فيها ومودي ينعفس! وباختياري بعد ألف و أدور واخلي من الموضوع شيء مايتجاوز وقته. خلصت لطريقه فعالة جدا: قسمت ضغطي إلى اقسام :

ضغط قدري:
هذا ضغط متعلق بأشياء مالي يد فيها داخل جسمي ، تقنيا يعني: ضغط صحي، مثلا انخفاض الضغط وقت مايكون فيه زحمة بشرية، انخفاض الضغط اوقات معينة لأسباب صحية والنتائج دوخة الفيصلية :] هذا الضغط أفضل إنو ياخذ راحته بس ما أحاول ألعب معاه، يعني ابعد عن الزحمات، ابتعد عن اي شيء يساهم في رفعه او خفضه :] لكن ما اقدر امنعه انه يأثر فيني بشكل سلبي. هذا الضغط أعطيه نسبة 40% من مجموع ضغطي العام.

ضغط المتخلفين:
يرتفع جدا عند قراءة او مشاهدة أو معاصرة أي حالة من حالات التخلف الفكري او السلوكي، هذا الضغط لحسن الحظن يسمح لي اتخذ موقف، وبنفس الوقت ما يأثر على عمل اعضائي بشكل سلبي. يعني ما ادوخ ، ما احس بكتمة. بس مثلا الدوخة والكتمة تتحول لموقف: يا اما تهزيئة باللسان :] او تصرف سلوكي يعالج هالتخلف. هذا الضغط أعطيه نسبة 22% من مجموع ضغطي العام.

ضغط المتطفلين:
يرتفع، و (مرات) يتزامن مع ارتفاع ضغط المتخلفين، إذ أنه من الممكن ان يكون هناك عمل تطفلي- وتخلفي في أصله :]. هذا برضو على الاغلب ارتفاعه اقل من التخلفي، لان التطفل مشكلة اصحابه، هم يتعبون لو فاتهم شيء ماقدروا يعرفونه وهيك، لكن التخلف مشكلتنا الجماعية ولازم نحلها. فالضغط التطفلي يرتفع قليلا بسبب انو شؤوني لي فقط سواء كانت خاصة أو عامة ماحد له حق يتطفل فيها ( فيس يناظر اللي ……… :] ). هذا الضغط من السهل خفضه و طرده بمجرد كلمة ( مالك دخل ) وتظل المشكلة مشكلة المتطفلين عشان كذا ما اضيع وقتي وما اعطيهم اكثر من كلمة (مالك دخل ) أو ما يقوم مقامها. فبليز لازم يتحملون مسؤولية انفسهم و يحلون مشاكلهم . هذا الضغط أعطيه نسبة 8% من مجموع ضغطي العام.

ضغط الاتكالين:
عندما يرتفع ينشط عصب الـ : “سألقنهم درسا” في الدماغ الأيسر تحت التجويف الأيمن ، مثلا تجي وحدة تسأل مية سؤال سخيف تقدر تلاقي اجابته لو حاولت محاولة قد النقطة انها تبحث عنه. اجاوب مره ، ممكن باحسن الاحوال 3 مرات .. المرة الرابعة بكل صراحة اقول: بليز انا ضغط الاتكاليين ارتفع! انتي المسؤولة بشكل مباشر عنه، لذلك لازم تنزلينه بانك تبحثين عن اجوبة بنفسك، فقط حاولي. للمراة التسعين بعد المليون والخمسين ألف أقول: مو لازم نعرف كل شيء أصلا مستحيل نعرف كل شيء بس بليز بليز give it a try ! ماحد يطالبنا نكون نعرف كل شيء، بس احنا مطالبين نبذل محاولة.  أثبت لنفسك ولغيرك انك شخص يمكن الاعتماد عليه، يقدر يبحث ويستخلص أجوبته، مستحيل بنلاقي شخص يجاوب كل اسئلتنا. شكرا مع التحية الكبيرة للحياة الجامعية اللي علمتني هالدرس. هذا الضغط أعطيه نسبة 5% من مجموع ضغطي العام.

ضغط الكذابين:
ضغط الكذابين كفيل انو يخليني يوم كامل اتسائل: لـــــيـــــــه النــاس تــكــــــذب ؟ هذا اخطر ضغط بعض المرات، لكن حله الوحيد : التغابي أو المصارحة والذب في الوجه مباشرة. التغابي هي بمثابة اقراص تخفظ هذا الضغط. والصراحة بمثابة قطع الطريق على الكذاب. ولحد الحين ماله علاج رسمي لتجنبه، لانه فعلا الكذب صفة خسيسة كفيلة انها تدمر الكذاب وتدمر اللي حوله. الكذابين اللي يكذبون بأي مناسبة وبأي شعور، وصار عندهم كل شيء رخيص وكل المشاعر رخيصة وكل الظروف رخيصة لدرجة انهم يستخدمونها في كذباتهم. هذا الضغط يصاحبه ارتفاع مؤشر الاستحقار في خلايا الدماغ الأيسر. ولا أنسى أقول انو الدماغ الأيمن يابى تصديق أي شيء من اللي تعودنا كذبهم. ( كلنا نكذب او سنكذب يوما ما. لكن تفرق لمن يكون الكذب عادة ولمن يكون الكذب استثناء – ما ابرر اللجوء للكذب ابدا- ). هذا الضغط أعطيه نسبة 25% من مجموع ضغطي العام.

see ! مارست طبيعتي البشرية وارتفع ضغطي، لكن الجميل اني اخترت انو يرتفع بنسب معينة بدل ما يرتفع كله وأخرب حياتي الجميلة على شيء ما يستحق. حولت بعض الضغوط لمواقف أتخذها تجاه الناس اللي لعبت بضغطي. وكم من مره استغبيييت هههه! وكم من مره قلت الصراحة ، وكم من مره رفضت اجاوب على اسئلة غبية ، وكم مره استخدم جين الصراحة و الوقاحة مع المتطفلين. وعشت حياتي بشكل أفضل. ارسم حدود ، حدد الاختيارات راح تكون أسعد، at least راح تكوّن صورة أفضل عن حياتك القادمة : ).

عندكم ضغوطات مقسمة ؟ :]

تحديث:
و انا أيضا يا نوال | مدونة إحسان r5