على أبواب الملحمة

السلام عليكم ورحمة الله وبركاته، موضوعين ممكن اقرأ فيهم يوم كامل بدون ما أحس على نفسي:
1- بداية الخلق
2- نهاية الكون وقيام الساعة.

على أبواب الملحمة، الكتاب اللي التهمته في غضون ساعتين ونص! كان هالكتاب يتكلم عن الموضوع الثاني، عن نهاية الخلق والكون ، وعن ملحمة أو حرب آخر الزمان، وممهدات قيام الساعة، وممهدات الملحمة نفسها. الكتاب تكلم عن تنبؤات الرسول عليه الصلاة والسلام عن الحروب والأشياء اللي راح تصير في وقت لاحق. برضو الكتاب تكلم عن تنبؤات الانجيل والكتب المقدسة، و أورد تنبؤات لـ نوستراداموس من المرجع : تربيعات نوستراداموس. ( ما أحس له داعي ذكر تنبؤات هالانسان صراحة )

يصنف الكتاب على أنو رواية، تدور احداثها في مجلس العلامة : عليم الدين وطلابه اللي من ضمنهم الكاتب ( صلاح الراشد ). قسم الكتاب إلى 7 جلسات:

الجلسة الأولى: فتنة الأحلاس – حرب الكويت والعراق.
الجلسة الثانية: الحرب العالمية.
الجلسة الثالثة: الملحمة الكبرى أو هرمجدون.
الجلسة الرابعة: مؤشرات الملحمة.
الجلسة الخامسة: صفات القائد العربي المنتظر.
الجلسة السادسة: الرجل الشرير والمسيح المنتظر.
الجلسة السابعة: التغيير في المستقبل.
التغيير بالزمن.

الكتاب يحتوي معلومات منوعة في شتى العلوم، النفسية والاجتماعية وتطوير الذات، والعلوم الشرعية وعلوم الاديان. على انو الكتاب مايوحي بهالشيء لكن لما تقرأه راح تلاحظ كمية المعلومات اللي فيه. من أكثر الأشياء اللي اعجبتني في الكتاب إنو الدكتور صلاح قدم للقارئ سبب قراءته للأشياء المستقبلية ( في حين انوا لكثير يبتعدون عن هالاشياء بسبب الخوف ). واستشهد بآيات على ضرورة الإحاطة بالظروف الجاية. أول ما تقرأ الكتاب راح تصاب برعب، واحباط لكن على حسب توصية الدكتور كان يقول: اللي بيقرا الكتاب باول فصوله لايقراه او يقفز لآخر الفصول. لأنو أول الفصول راح تعطيك شعور سلبي وخوف لكن بمجرد ماتقرأ الفصول الأخيرة راح تحس بشعور ايجابي وبكمية التغيير اللي تقدر تسويه، ممكن بالإيجابية لكل شخص تخف حدة الظروف الصعبة على المؤمنين. الجميل انو الكتاب ما يتكلم عن فترة آخر الزمان بالطرق الاعتيادية اللي نقراها، لا الكتاب يعطيك خطة بسيطة كيف تواجه الظروف في حال الحروب النووية ، وايش اللي ممكن تدخره او كيف ممكن تكون عضو فاعل في مجموعتك. جدا أعجبتني هالنقطة وحسيت انو ما راح استغني عن الكتاب في مكتبتي. باختصار الكتاب ما يكتفي بالشعور السلبي او الخوف وفقد الامل، بالعكس الكتاب يعطيك شعور إيجابي تجاه كل المجريات.

لمن تكلم عن فترة المسيح الدجال تمنيت إنو أموت قبل ما أحظرها :”( شيء يخوف فعلا هالفتنة! بس لمن اقرا عن فترة وجود المسيح عليه السلام وفترة السلام اللي ما عاشت زيها البشرية من اولها أشتاق أعيش هالفترة :”( دايمن أقول احنا جيل انولد في حروب و أوضاع سياسية سيئة جدا! نفسي من جوا تحن لفترة سلام وسط نبي من الله. أبي أجرب شعور اللي يكون بيننا نبي مرسل من الله! وانتوا كيف تحسون ؟

فيه أشياء تكلم عنها الكتاب جدا رائعة منها:
* السبب المتوقع لحث الرسول عليه الصلاة و السلام لأمته صياح الأيام البيض.
* مراحل نشاط المخ ( بيتا – ثيتا – الفا …الخ) وضحت لي أشياء كثيرة كنت أجهلها لمن مودي يتعكر فجأة :/ راح اتكلم عن هالشيء في تدوينة قادمة بإذن الله. الله يحفظنا وإياكم من سوء الفتن.

أنصح بالكتاب وبشدة، حتى للي يخافون من هالأمور.
اسم الكتاب: على أبواب الملحمة.
المؤلف: صلاح صالح الراشد
السعر : فوق الخمسين ريال ما أتذكر بالضبط كم. – من مكتبة جرير
عدد صفحات الكتاب: 242 صفحة

* من هو نوستراداموس؟ | نبوؤاته
قراءة ممتعة.

:yy: