كم مره صرت lexie ؟

للي تابع Grey’s Anatomy أو حتى للي ما تابع بيحس بشعور ليكسي المليان ألم من هالموقف:

× ليكسي تخبي شعور لجورج اومالي، والظاهر ان هالشعور من طرف واحد بس. دايمن تهتم له وتداريه وتهتم لكل أموره وشعوره ولكل الظروف اللي يمر فيها سواء كانت سيئة أو جيدة.
بس طبعا اومالي مو هالقد يهتم فيها او بالأصح ما يبادلها نفس الاهتمام ولاهو راضي يفهم ان هالاهتمام من شعور حب.
اومالي اختبر عشان ينهي دوره كمتدرب في المستشفى ويتحول لطبيب مقيم بعد ما فشل في الاختبار الأول، محد سانده ودعمه بقد ليكسي.. كانت تقوله انو راح تنجح وراح تكون الأمور بخير وكويسة .. وراح اعزمك على beer وحتى لو فشلت بالاختبار راح اعزمك على losers’ beer . وفي الوقت اللي هي متحمسة ومستعدة تتقبل نفسيته نجح او فشل محد اهتم له، او بالأصح محد اهتم لها بنفس القد اللي تهتم له ليكسي .. كانوا يسألون مجرد سؤال عادي – عابر. ولكسي مقدمة اومالي واختباره على كل شيء..
في آخر الدوام الرئيس أعطاه الظرف اللي فيه نتائج الاختبار، من حماسها سحبت الظرف تبي تتطمن ع النتيجة ، وفعلا طلع pass . وفرحت كثير يمكن فرحت اكثر منه. وهو بكل برود راح يخبر الباقين اللي ما اهتموا ولا سألوا .. الباقين اللي كلهم لاهين بأنفسهم وبحياتهم ، الباقين اللي مو مثل لكسي ، اللي تركت كل شيء يتعلق فيها واهتمت له.
انكسر خاطرها ومع كذا انتظرته .. ماعارها أي اهتمام .. ولو نقطة اهتمام. ولو شكرا على اهتمامها ماقال .
هي عند وعدها .. بعدها بتعزمة ع ال beer ، راحت للبار وتفاجئت .. لأانها لقته هناك مع الباقين . مع ميرديث وكرستينا وايزي اللي ما اهتموا له .. البقية اللي ما سألوه عن اختباره وهو اللي راح يبلغهم الخبر..  بس ليكسي اللي مهتمة جزاها انه ينساها.. وينسى حماسها ويخليها وحيدة ..
حست بخيبة أمل .. مدري ليه فهمت شعورها اكثر شيء بالحلقة. حسيت بخيبة أملها وبصدمتها .. حسيت انو في ألف سؤال يدور براسها وما حكت. حسيتها تقول ليه كذا ؟ ليه اللي يهتم ويحب مايلاقي المقابل .. ليه ينساني ؟ ليه مايهتم لوجودي حتى ؟ ليه اهتم انا أصلا وانا بالنسبة له ولا شيء .. شافها جورج وهي داخلة .. وبكل برود برضو قالها تعالي واجلسي .. وحتى ما كلف خاطره يطلب لها beer .. البير اللي وعدته فيها .
بكل خيبة أمل راحت وجلست بكرسي لحالها .. لان هذا اللي تستحقه بالضبط لأنها اهتمت..

ليه نهتم لأشياء مو لنا ؟ ليه نطول واحنا نفكر فيها. وبعد مايضيع الوقت ننتبه انها مو لنا.
ليه نحطها في قائمة الأولوليات مع انها مو معنية لنا.. ولا تخصنا.
ليه نحب هالأشياء وهالناس .. مع انها مو ملكنا . ليه حتى نحبها وهي تخذلنا ؟
ليه نجري ورا اشياء وناس .. ونفسها الأشياء ونفسهم الناس يجرون لشيء ثاني ..
ليه نظل نركض ؟ ليه ما نوقف من قبل ما نبدأ نركض ؟

كم مره صرت مكان ليكسي ؟ كم مره انتبهت انك مضيع وقتك مع الناس الغلط ؟