كم نحتاج سنة عشان نفهم ؟ بس نفهم !؟

للي يشوفون الموضوع ما يستحق ، و لـعشاق امسحي الإيميل وريحي راسك : هذا الموضوع ما يناسبكم ..

* لمن كنت أشوف الفلم الوثائقي Muhammad: Legacy of a Prophet أول شي استفدته في حياتي إن الإسلام “ موقف “ وحديث الرسول عليه الصلاة والسلام : “ من رأى منكم منكرا ً ….. “ أكبر دليل على أن المسلم ما يصير انه يكتف يدينه ويتجاهل المواضيع وخصوصا الحساسة منها. والاسلام رتب ردات الفعل والمواقف مراتب ادناها الانكار الداخلي وهذا شاهد واضح أيضا ً إنه المفترض ما نتجاهل موقفنا طالما نقدر نعبر عنه.

أنا أشوف ان الموضوع حساس جدا .. إننا ننشر ايميلات ماندري صحتها من غلطها.. بنظري مشاركة في الجريمة حتى لو ما كان عندك خبرة بالموضوع المرسل اقلها ما تساعد في نشره وانت مو متأكد.. يعني هنا “ القانون لايحمل مغفلين “ ينطبق بشدة على الناس اللي تسوي فورورد لمجرد الفورورد ، وبصفتي خريجة علوم حاسب آلي وأعرف في التقنية الشيء اللي يفيدني ويفيد غيري لازم اتخذ موقف لانهائي من المهازل اللي تصير .. استغلال جهل الناس بالتقنية وارسال رسائل لهم واستعطاف قلوبهم بنظرية المؤامرة الأزلية بلا شك شيء يغيظني ويسبب لي قهر ! اي نعم انقهر من المستوى اللي وصلنا له في التفكير !! ما نحاول ابدا ندقق في المعلومات اللي توصل لنا ؟!! حتى لو كنا جاهلين بالتقنية ! هذا العذر مايتيح لنا نمرر الرسائل بدون ما نعرف صحتها .. خليها توقف عندك افضل من انها تنتشر وتنبني عليها ألف كذبة وكذبة ..
ايش الي صاير ؟!! الإيميل صاير مصدر تشريع هالقرن واحنا ما ندري ؟! في أي جلسة وفي أي مكان نسمع : انا قريت بالايميل ، شفتي هذاك الايميل ؟! وصلتني فتوى بالميل ..
من جد : ما هذا ؟!! وش اللي صاير في عقولنا كمسلمين متعلمين ؟!! واذا وصل هالشيء بالميل خير ياطير ؟ كلام الله والا كلام رسوله ؟ مجرد كلام بشر نصهم يألفه والنص الثاني ينقل ومع تواتر النقل والتمرير يتألف مع الإيميل ألف كذبة وكذبة .. والناس شغالة تمرير وتسعى لاكتساب حق انا اول شخص ارسل هالميل الخطير !!
لمتى عقولنا نايمة ؟ ما صار الوقت انها تصحى ؟ ايش ناقصنا ؟ تعليم ومتعلمين لدرجة ان نص الشعب طالع برا يدرس تعليم عالي .. وين يروح هالعلم والتفتح ويييين يروح ابي افهم!!
انا اشوف ان الموضوع حساس وفيه استغفال .. وفيه اضافة مصادر ( هزيلة ) للعلم والمعرفة .. أول كنا ناخذ الدين من الكتاب والسنة والاجماع ولو حصل شي فيه خلاف نرجع لشخص علمه غزير ، كنا ناخذ المعلومات العلمية من كتب موثقة او من علماء .. كنا ناخذ كل شي من مصدره .. والحين !! الإيميل صار يحكم حياتنا ! رسالة ممرة من فلان اللي مايعرف ولا حاجة عن الموضوع الفلاني صار رأي يعتد فيه  ويتناقش حوله ؟!

اللي غاضني أكثر إيميل وصلني من شهر ونص تقريبا كان يقول الميل :

بسم الله الرحمن الرحيم

السلام عليكم ورحمة الله وبركاته

..// أنا شخصيا جربتها ولقيت الدبدوب القذر//..

|| لكي تحافظ على جهازكـ اعمل كما في الصور القادمة||

قامت مجموعة من المبرمجين  بإنتاج فايرس جديد

أخطر من فايروس بلاستر ويقوم الفايروس بتحميل نفسه

على جميع أنظمة الويندوز وسيقوم الفايروس بتدمير الهارد وير بدأ من تاريخ 20-5-2009

للتخلص من الفايروس اتبع الخطوات التاليّة :-

اضغط على

http://www.mekshat.com/pix/upload03/images110/mk95610_335335.jpg

ثم اختر من نفس قائمة ابدأ

http://www.mekshat.com/pix/upload03/images110/mk95610_2211212121212121212121212121221212121.jpg

سوف تنفتح لك نافذة اختر الاختيار التالي :

http://www.mekshat.com/pix/upload03/images110/mk95610_333232323232323223232333333333.jpg

وبعدها ضع اسم الفايرس بالاسم التالي للبحث عنهُ :
Jdbgmgr.exe

ضع اسم الفايرس كما في الصورة ثم اظغط بحث :

http://www.mekshat.com/pix/upload03/images110/mk95610_54545454554555455455455455545.jpg

إذا لم يظهر لك أي نتيجة فاحمد الله على ذلك فجهازك نظيف .
أما إذا كان جهازك مصاب فسيظهر لك الفايرس على شكل دب رمادي لاتفتح الفايرس

وهذا هو شكل الدب القبيح واعمل كما في الصورة ….

http://www.mekshat.com/pix/upload03/images110/mk95610_555555566666666666666666.jpg

قم بحذفه من مكانها كأنك تحذف ملف عاادي ثم اذهب إلى سلة المحذوفات واحذفه أيضا كأنك تحذف ملف عادي

ملاحظة : احذر من الضغط بالزر الأيسر بالخطأ كي لا تشغل الفايروس
وبعدها لاتنسى تنظف سلة المحذوفات منه

النكتة المتنكتة اللي ميتة تنكيت إن هذا الملف ملف ديفولت من المايكروسوفت عشان هذا الملف مسؤول بشكل مباشر عن وجود الجافا في جهاز اي إنسان، يعني هذا Virus Hoax يعني برضو لا فايروس ولا هم يحزنون ، واللي بيحذفه وهو جافا ديفلوبر بيواجه لخبطة في تطبيقات الجافا على جهازه ، وهذا الملف  debugger registrar for Java.  يعني ما له علاقة بأي شكل من الأشكال بعائلة الفيروسات…
المهم اني وقتها سويت ريبلاي للبنت وشرحت لها السالفة ، وتمنيت في آخر الرسالة انها تسوي تنبيه لكل اللي ارسلتهم بس ماوصلني شيء! وتمنيت انها ارسلت للكل الا انا.

المصيبة الأكبر من نص ساعة وصلني هالميل :
اضغط هنا ، وهنا ، وهنا ..

قووووووووول قسسسسسسسسم بس !أنتحر ؟ انتتتتتتتتححححححححححححححر ! شوفوا كيف من شهر ونص كيف جاي وما جاب سيرة العرب ولا اليهود بالموضوع ! والحين بس مر شهر ونص وانقلب الموضوع إلى انو هذا الفايروس  “اللي مو فايروس اصلا “ صار من عمل مجموعة من مبرمجين اليهود ! مين هذا الكذاب اللي يكذب على الناس ويطلع كلام زي كذا !! ويتكلم باسم الدين والخايف على المسلمين و الدين !! شلون يكذب كذبة زي كذا !! هو يكذب هالكذبة لأنه مستخف بعقول الناس وداري انهم بيصدقونه وفعلا ! صدقوه وارسلوها لكل القائمة وراحوا حذفوا الملف وهم مغمضين !! انقلب الموضوع من فايروس إلى حرب بين المسلمين والعالم كما هو موضح سموه في آخر الرسالة!! حسبي الله ونعم الوكيل بس !!
مخي مشوش ابي افهم كيف الناس تقرا كلامه وتصدق ؟! مو عشان شي بس ياعالم شوفوا وش كاتب :

وهو فايروس موجه للإيميلات العربية والعرب على وجه الخصوص

وشلون تجي ذي 😐 موجه للإيميلات العربية ، والعرب على وجه الخصوص ؟!
يعني العربية ناس غير العرب ! ابي افهم شلون يمر على مخ انسان متعلم هذي الجملة بدون ما يشكك بصدق الايميل !!  بالنسبة لي اللي سوا التمرير للرسالة زي اللي سواها بالضبط ، لأان دقيقيتن سيرتش ما راح تاخذ من وقتك ! او ع الاقل دقيقتين لمسح الايميل وعدم تمريره للقائمة أحسن بألف مره من هالغثاء للي نشوفه بالإيميلات.

يا عالم اطلعوا من جو نظرية المؤامرة شوي .. فكروا بأنفسكم وخلوا عنكم التفكير وش بيسوي فينا الغرب! انا متأكدة اني مو معطية الموضوع اكبر من حقه ! يمكن انا ما عطيته حقة كفاية .. لأنه صدق شيء حساس ويمس تفكيرنا ويمس مبادئنا وطريقة حياتنا.. شيء يعبر عننا اننا ناس تاخذ الكلام بدون ما تتحرى وتصدقه ! اننا ناس همجية و دلخة ترسل وبس، ترسل وما تدري انه الكلمة ممكن تودي صاحبها في النار !! ترسل متوقعة ان الموضوع بلاش و سهل وما هي منتبهة ان اللي يشارك في كذبة زي الكذاب نفسه! ماهي مستوعبة لحقيقة ان مجتمعنا محتاج لإصلاح مو محتاج لرسائل زي كذا !! محتاج لحقائق ثابته مو محتاج لحروب عاطفية مالها اساس من الصحة .. لو احد فينا مهتم لنظرية المؤامرة ما تصرفنا كذا .. لو كنا مهتمين صدق والاسلام شايلين همه على كتوفنا ما كان كذا انتاجنا مجرد تمرير رسالة والسلام .. لو كنا مهتمين للاسلام كان قدمنا شيء يشرفه واكتفينا من صفوف الدفاع ( الوهمية ) وصرنا صف هجوم ايجابي ..
كل شخص منا فاهم وممتعلم مسؤول عن مثل هالظواهر ، مسؤول بأنه يصحح ويقف وينشر الصح .. ساعدني بنشر الصح وقتل الخطأ من عقولنا ..