Day 21

كنت مع جود اليوم طالعين!ومعاي الكام، كنت أقولها تحبين ربي ؟ تقول إيوا مره أحبه.. قلت طيب تحسينه هو اللي يبسطك ؟ قالت لي إيوا.. قلت طيب لمن تنبسطين وتحسينه هو اللي خلاك مبسوطة ايش تسوين؟ راحت تركض وهي متشققة من الوناسة وما تتصنع، لا فعلا كانت مبسوطة ! على طول سويت كلك 🙁 !

حسيت إنو بهاللحظة أبي أبكي!! حسيت إنو أبي أوقف كل شيء يمشي بالكون وأسجد لربي! ما أدري ليه حركت فيني هالشيء بردة فعلها! حسيت بالبراءة وحسيت من جد الأطفال أحباب الله، بكل بساطة عبرت عن شعورها والجميل انها انخرطت فيه ونست انو اصلا انا كنت اسألها ! أعرف هالشعور ليه ! مو لأنها طفلة وبس، لا .. لان حب الله فيها فطري ونقققي ولسا ما خالط هالحب أي شائبة من الدنيا. أحب ربي والله العظيم، وأستحي منه لدرجة مرات أدور حوالين نفسي أبي أتخبى من كثر ما انا استحي منه 🙁 لأنه مغطيني نعم ولازلت أخطئ ولازالت أهواء نفسي تغلبني، بس أنا أحبه وأتقرب له أكثر بأخطائي! لاني أعرف انو رحمته سبقت غضبه، ولأني أعرف إنو عفوه يشملنا جميعا ولانو ربنا يتوب علينا جميعا مهما بلغت ذنوبنا ! ولاني ما بيأس من رحمته لانه قالنا بالقرآن: ” قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ “. أنا أحب ربي وكوني أغلط هذا لايعني إني مو قريبة منه أو ما أحبه، ومايعني انو اللي مايشوفون أفلام أو يسمعون موسيقى يحبونه أكثر مني! ولا يعني بالضرورة أنهم أقرب له. وهذي النظرة لازم تختفي.. أنا أحب ربي واحب الرسول ولكني بشر ،الأصل فيني النزعة للخطأ، ومو بالضرورة الشخص اللي يحب الله هو الملتحي او المقصر! كلنا ولو اخطأنا نحب ربنا. ودائما نسعى نحسن من أنفسنا عشان نرضيه!

الاسبوع اللي راح قررت إني أبتسم كثير، وأوصي اللي متابعيني يبتسمون بعد، هالاسبوع ممكن نحب ربي أكثر ؟ نسوي اي شيء نيته لله، حتى لمن تروح شغلك شيك على النية قبل عدلها، أو جددها ! هالاسبوع وطالع بحب ربي أكثر ان شاء الله. وبتذكره في كل امور حياتي اكثر، مين معاي ؟