وين خلاصك ؟ | Dead Man Walking

احترم الفلم اللي بيوصل شيء، بيوصل هدف، بيوصل فكرة بطريقة راقية ! احترم الكاتب المخرج والمنتج والممثلين لمن يبحثون وينتجون  قصة تغير في المشاهد حاجة. ويمكن تغير من كل أفكاره. أحترم هالفلم كثيييييييييير! ماحد يتخيل قد ايش هالفلم غيّر فيني ولا حد يتخيل قد ايش شعوري وانا اشوفه وبعد ماشفته. فلم صادق باختصار!

اسم الفلم: Dead Man Walking – 1995 .
مدة عرض الفلم: 2 ساعة و 2 دقيقة.
نوع الفلم: دراما مبني على قصة حقيقة مكتوبة في كتاب من تأليف الراهبة اللي شهدت القصة كانت مسؤولة عنها  Helen Prejean

أجزم هالفلم بيغير من شعورك تجاه الحياة والحقيقة ولو بنسبة بسيطة! ما اقول الفلم هو نفسه بيغيرك لكني متأكدة لو وصلك الشعور اللي بيقوله الفلم راح يغيرك الشعور، راح تهزّك الرسالة اللي توصل. ما راح أتكلم عن القصة أكثر من إنو محور الفلم يدور عن راهبة وصلها طلب مساعدة من رجل محكوم عليه بالإعدام لاشتراكه في جريمة اغتصاب وقتل. الرجل مصر إنه بريء وطلب مساعدة الراهبة في اعادة المرافعة في القضية واستخلاص تخفيف للحكم والتراجع عن حكم الاعدام.

لمن كنت أشوف الفلم ما توقعت إنو من جد من جد بيكون صعب علي اتنفس في بعض المقاطع في الفلم، ولا ظنيت اني بتأثر من جوا! ولا ظنيت اطلاقا انو ممكن انظر لبعض الاشياء بنظرة مختلفة تماما. بجدارة الفلم يتكلم عن اشياء كلنا نحتاجها سواء كنا مسلمين او مسيحين او ندين بأي دين. احنا ندين لأنفسنا بالحقيقة ! الحقيقة و الحقيقة وحدها هي السبب في تحريرك! هي السبب انك تقدر تتقبل كل شيء حولك، هي السبب انك تعرف نفسك وايش قدراتك وايش اللي تستحقه! الحقيقة تستاهل منا نبحث عنها ونعترف فيها. المسألة في الحياة مو دايمن تدور حول الصح و الغلط لان تظل فيه اشياء نسبية ماهي محكومة بحكم واحد! لكن القضية اللي بيلفت نظرك لها الفلم  هي قد ايش انت قادر وعندك الرغبة انو تكون صادق مع نفسك بالمقام الأول، وبالتالي شوف قد ايش راح تكون صادق مع اللي حولك! قد ما الفلم صادق قد ما حطيت نفسي مكان المجرم ! وقد ماحطيت نفسي مكان اهل الضحايا،وقد ما حطيت نفسي مكان الراهبة اللي مو عارفة وش تسوي بالضبط لكن عندها يقين وايمان انو لازم تظل مع هالرجل للنهاية حتى لو كان مخطئ، حتى لو كان مذنب، لكنه يدين لنفسه بالحقيقة! لكنه رغم كل هذا يستحق يعرف حقيقته ويتقبلها ويتحرر ! اللحظة اللي نعرف فيها ( حقيقة ما )هي اللحظة اللي نبدأ فيها ننتقل لمرحلة جديدة أفضل، هي نفسها اللحظة اللي نتقبل أنفسنا ونتحرر من أي شي كان يأسرنا. اللحظة اللي تعرف الحقيقة هي اللحظة اللي فيها خلاصك. الحقيقة صعبة ومو سهلة وتقبلها اصعب ومو اسهل ! لكن يكفي انها ( تحررك ) يكفي انها تكفل لك تشوف العالم زي ماهو! بدون انكار وبدون تجاهل وبدون تظاهر…

أعجبني كثير إيمان الراهبة وتمسكها بفكرتها ومناضلتها لاخر يوم حتى تعطي الرجل المتهم هذا فرصة. قد ايش حلوة الحياة لمن يكون عندك ايمان ويقين بحاجة معينة ؟ ايمان يخليك مستعد تخسر اشياء كثيرة ولايهمك! الايمان اللي يخليك تناضل حتى النهاية. الايمان اللي يخليك توقف مع شخص مخطئ ومجرم لاخر لحظة في حياته وتشوف انفاسه وهي توقف وانت تتذكر قد ايش عطيته وقد ايش ساعدته يفهم الحقيقة ويفهم الدين ! اعجبني فيها قوة شخصيتها وتجاهلها للانتقاد. اذكر في مشهد كان واحد يقول لها كيف انتي راهبة وما تغطين شعرك! حبيت فيها حاجة انو كلنا بحاجة نكون قراب لربي حتى لو كنا مخطئين ، وحتى لو كنا مو زي المظهر العام للي يعتقدون انفسهم متدينين. انا ما اتكلم عن تصرف حجاب الشعر بحد ذاته، لكني اتكلم عن موقفها ومبدأها تجاه هالشيء ! كونها كملت مسيرتها كراهبة وعندها ايمان بكل حاجة وماخضعت لاشياء ما تؤمن فيها وشافت انها من حقها تكون راهبة وسخرت حياتها لله! هذا شيء جريء وتقدّمي فعلا! لانو الاحظ عندنا حاجة انو مثلا انت طالما عندك تصرف مو كويس تجاه دينك مثلا تسمع اغاني كلهم يطالعونك بنظرة: كيف مثلا بتغير المجتمع وانت تسمع اغاني؟ ومين قال انو الدين حصر على اللي مايسمع اغاني بس ومين قال انو التغيير بيد الملتزمين بس؟! او كيف هذا يطلع في برنامج دين وهو ملتحي ؟! نظرة اشوفها سطحية جدا ونظرة مستعجلة وتشخيصية لا اكثر.

فيه شيء وصلني من الفلم ومره قلبي انفتح له، إنو وين خلاصك ياترى ؟ طلعنا يمين يسار، مشينا ورا اهوائنا ، مشينا ورا كلام الناس ! طلعنا فوق او نزلنا تحت خلاصك في الدين ! الدين الصح وبس. خلاصك في حب الله اللي بيدلك على الحقيقة اللي بتدلك ع الحرية! خلاصك في الدين، في التشريع الي ينظم حياتك ويهذب نظرتك للحياة ويقوّم سلوكك تجاه خالقك وتجاه نفسك وتجاه الناس. خلاصك دائمن يبدا في علاقتك مع الدين، بعيد ؟ او سطحي ؟ او بس مظاهر ؟ ما راح ترتاح. هل انت قريب ؟ تعرف حدودك صح ؟ دينك يبدأ من جوا ويطلع برا ؟ ايمانك عميق ؟ تخطئ ويمكن كثير لكنك تدل طريق الرجعة كل مره ؟ أظمن لك حياتك راح تكون أفضل. مافي شي بيدلك ع الحقيقة غير الدين، ومافي شي بيحررّك غير الحقيقة في الدين. تخيلوا قد ايش احنا احرار بمجرد كوننا مسلمين! لكن المهم تفتح قلبك وعقلك للحقيقة! انت تملكها اصلا لكن استخدمها ! شوف قد ايش المسيحين مظللين بفكرة موت المسيح عليه السلام عشان خطاياهم وفكر قد ايييش انت محظوظ انو انت تعرف الحقيقة وانو المسيح رفعه الله وما انصلب ولا انقتل ولا مسته يد من ايدي اليهود ! شوف قد ايش القرآن اعطانا حقائق كل شيء وشوف قد ايش الرسول علمنا ( كل ) شيء نحتاجه وفهمنا ( كل ) شيء نقدر نبني عليه حضارات عظيمة ! افهم الدين صح، افهم كيف تكون علاقتك مع الله والرسول صح وراح تلاقي خلاصك ! يارب افتح قلوبنا للفهم الصحيح الوسط لهالدين r5.

الفلم على ما اتذكر مافي مشاهد مخلة : ) يمكن في تصوير مشهد الجريمة نفسها لكني صراحة مو متذكرة مضبوط، وسالة الفلم سامية جدا تقدر تستخلص منها كثير اشياء تناسبك. الهدف اللي بتوصل له الكاتبة والشيء اللي بتقوله جدا راقي! ولاحد يدقق على انهم مسيحين ومدري ايش كل واحد منا يعرف وش ياخذ وايش يرفض : ) . اداء الممثلين ! اداااااااء الممثلين شيء يذبح ! شيء روعة انو تشوف قد ايش اللي قدامك اخلص في عمله عشان يوصلك بهالطريقة، شين بين كان مبدع مبببدع في الدور، ماقدرت اتخيل احد غيره في الدور ! عيشني شعور المحكوم بالاعدام لدرجة مرات انحبست انفاسي وانا اتخيل نفسي مكانه وبعد كم يوم بيعدموني ! شيء فوق التحمل صراحة ! سوزان كانت الممثل المناسب في الدور المناسب! ما اقدر اقول شيء سلبي عن ادائها ولا اقدر اوصف قد ايش كان الدور معاها روعة ! السيناريو مكتوب بعناية ، والاخراج لايمكن يكون افضل من كذا!

دراما الفلم مو عادية، دراما الروح والدين، قد ايش روحك مرتبطة بالدين والحقيقة الكاملة، دراما توصلك قد ايش كل انسان يستحق الغفران طالما هو مقر بالحقيقة و يبغى يتطهر من ذنبه! قد ايش كل واحد فينا ولو كان مخطئ لكن عفو الله وحبه لعباده يشمله ويغرقه بعفوه وغفرانه! هالفلم يثبت لك اشياء كثيرة ويهديك مفاهيم حقيقة! ويعلمك قد ايش : ياخسااارة احنا مسلمين لكن افلامنا ما تتعدى في افضلها قصة حب سخيفة! وهم قاعدين يحطون طاقة سينمائية وانتاجية مو سهلة في فلم روحاني! ليه ما نتعلم انو السينما وصناعة الافلام بذاتها مو حرام! ليه ما نتعلم انو بالسينما ممكن تنتج شيء يغير في البشرية فكريا نحو الافضل ؟

* ماعندي تورنت للفلم :]