ya Allah, FREE Me.

×
أنا الإنسانة اللي تبي تهاجر ، تبي تبعد ، تبي تغرب ، أنا الإنسانة اللي تبي تطير
تبي تبعد عن الأرض لاي مكان مايهم .. انا الإنسانة اللي تبي تهاجر .. لـ اللامكان ، ل اللازمان ، لـ الولا شي.
انا اللي تبي تروح وتترك كل شيء وراها، تهرب يمكن ؟! بس تبي تعيش حياة جديدة وبداية جديدة بأشياء جديدة وناس جدد، أبي أنسى أبي أسلى ، أبي أتحرر .
أبي أسافر لمكان ما أعرف فيه أحد ولا احد يعرفني ، أبي إذا مريت من ناس مايعرفوني وانا بعد ما أعرفهم ، أبي أمر زي الغريبة من بين الناس ، ابي إذا مريت من عند حد يصير غريب عني ما لي معاه سوابق مالي معاه مواقف ، ما كرهته ولا كرهني ماحبيته وخذلني ولا حبني وخذلته ، مابي اكون غلطت عليه او عطيته اكثر من حقه .. ابي امر من ناس ( كذا ) مالهم تأثير بحياتي سلبي او ايجابي ، مالهم اي وجود بحياتي .. مالهم اي معنى بحياتي ..
ابي أمر من الناس وانا مو شايلة بقلبي على أحد من هاللي امر منهم .
أبي امر على وجيه غريبة غير الوجيه اللي أعرفها .. غير اللي ألفتها .. غير اللي تذكرني بشء مضى وراح .. أبي أمر واللي يشوفني مايعرف وش هالكائن اللي مار ، وش اصله ؟ ومين هو ، ومن وين جا ؟ وايش الظروف اللي مره فيها .. ابي انولد من جديد في ناس جديدة في ظروف جديدة .. في جو جديد ، بقلب جديد نظيف، بروح شابة مو تحس بالهرم .
أبي ابعد عن هالمجتمع المتخلف اللي عايش حياته فوضى وحاط قوانين غبيه ، ابي ابعد عن كل هالقيود اللي مالها أصل .. ابي قيودي بس في ديني .. مابي قيود غبية حطها ناس قبل 100 سنة وقدسوها .. أبي أنسى هالمجتمع اللي يقيم الناس بحسب قوانين غبية حتى الطبيعة ما تقبلها ، ابي اروح عن هالمجتمع اللي مليان قيود وكل انسان يناقض نفسه ويخالف هالقيود اللي متبنيها ، عارف كيف يامجتمعي انت كيف صاير ؟ انت صاير زي الشارع فوضى، فوضى ، فوضى ، وحاط لك إشارات كلها خربانة .. متى ما صح لناسك انها تقطعها ، قطعتها ، ومتى ما حبت تتقيد فيها تقيدت .. انت فوضى عارمة.
أبي أبعد واسافر لناس ما اتكلم لغتهم وما يحكون لغتي ، ما افهم وش يقولون ولا يفهمون وش اقول .. ابي ما اتكلم عن احد أصلا .. أبي اسمعهم يحكون ويتكلمون ويثرثرون وانا ما افهم ولا كلمة ولا حرف ، ولا ادري وش الموضوع اللي يحكون عنه اصلا ..
أبي مكان مايعرفني ولا يقيمني، ولا يعد لوجودي شيء ، ابي مكان ما ارتبط فيه بأحد ولا اقيم فيه حد ، ولا أعد لوجود أحد أي شيء .. أبي مكان امشي فيه امشي امشي امشي امشي ، أركض أركض أركض ولا تعبت ، وقفت . بعدين رجعت أركض أركض اركض .. وبعدين إذا شبعت من الركض أصرخ .. راح اسوي زي فورست قامب بالضبط بركض لمدة 3 سنوات وإذا حسيت اني اكتفيت ما راح أوقف وارجع ، لا بصرخ صرخة قوية بطلع كل التراكمات وبعدها برجع
برجع للمكان اللي محد يعرفني فيه .. ما اتكلم كلامهم ولا اعرف عاداتهم ..
أبي وأنا مسافرة تمطر ، أبي المطر يغسلني ويغسل وسخ روحي ، ابي المطر يوديني لحياة ثانية صافية ، ابي المطر يساعدني إني أعيش أسمى حالاتي النفسية .. أبي المطر لروحي ولجسمي ، جسمي محتاج المطر يبلله ، محتاج يرطبه من الجفاف، أبي إذني تسمع صوت المطر وتنتعش ، أبي أذوق طعم المطر وتنفتح شهيتي لكل الاشياء .. ابي المطر يغسل راسي وتنزل معاه كل الذكريات السيئة .. أبي أجمع كل الذكريات السيئة وأطلعها من راسي المتعفن وأرميها لابعد مكان تقدر توصل له طاقتي .. وأرجع بدونها.
أبي ريحة المطر ريحتي ، أبي المطر لروحي ولكل شيء فيني .
ياربي سافروا وتركوني ، ياربي راحوا وما سألوا .. ياربي انا ابي اسافر واتركني زي ماتركوني ، واترك كل شي وراي ، مابي قدامي شيء ، ياربي راحوا وكلهم قسوة ، ياربي انا ابي أسافر وكلي قسوة وما اسأل باللي يقول لي ارجعي ، ومابي اسأل ع اللي فات ..
انا اللي تعثرت بحياتي كثير واللي عثرني مو حجر طريق ، انا اللي تعثرت بالناس اللي تفهمني وافهمها ، انا اللي تعثرت بالكلام، تعثرت بالنظرة ، تعثرت بالفكرة ،
انا اللي في فترة كل الناس ساعدوني وما ساعدت نفسي، انا اللي بقترة محد ساعدني وانا اللي ساعدت نفسي ، انا اللي الحين عندي القوة اني اترك كل شيء وأهاجر .
ياربي ارزقني سفراً ..
ya Allah, FREE me.

* الكولاج:
ألوان مائية – ورق جرايد بلغة ما أعرفها :]
ألوان خشبية ، ريبون منقط
قلم اسود خطاط – كراس ملون.

كل شي في هالعمل مقصود، من ادق التفاصيل لأكبرها

* اللي بيرد ويمدح المجتمع ويقول كلام من هالقبيل ، مايحتاج ترا :$