أما بعد .

بدري صح ؟ :] أعرف إني كثير طوّلت! بس بظل أعاتب المزاج وبظل أعاتب الشغل والزحمة عشان ما أزعل من نفسي و أطلع منها زي الشعرة من العجينة!

إيش اللي تغير ؟ بـ 12 ديسمبر رميت سنة واستقبلت سنة جديدة، وبعدها بـ 20 يوم صرنا بالـ 2010! يعني أيام جديدة كليا، إيش اللي صار بسنة راحت من عمري ؟ أقدر أقول إنو 2009 متذبذة على الصعيد الشخصي والعام. وعلى رغم كل الأشياء المحزنة فيها إلا إني سعيدة جدا ! فعلا هذي هي السعادة إنك تحس فيها من جوا بدون أي مؤثرات خارجية تجبرك تكون سعيد. في سنة ايش صار ؟ وايش تغير في نوال؟ وين كانت و وين صارت ؟
في سنة 2009 ناقشت مشروع التخرج وخلصت منه بنجاح الحمد لله! وتخرجت !، اشتغلت، أخذت أول مستحقاتي :] نضجت أكثر و أكثر، صار عندي إيمان أكثر من أول بكثير شكرا يارب!
في 2009 صار حدث مهم جدا بالنسبة لي وهي إنو تغلبت على شعور كان يعيقني من أشياء كثيرة، تغلبت على ذكرى حزينه وتناسيت جرح هزني لكذا سنة ! قدرت أكمل حياتي وبلحالي! احتفظت بالأشياء الجميلة من التجارب السيئة وكبيت الذكريات المو حلوة في القاربج حق مخي! أبغي اسوي لها ريستور فقط لمن أحتاجها في أي مرحلة جاية من حياتي إن شاء الله. تخلصت من عادات سيئة ! واكتسبت عادات محببة جديدة. ياجماعة نوال صارت ما تشرب بيبسي :] من رمضان بطلنا بيبسي :] . رجعت قارئة جيدة للكتب وبجدارة ! أكثر شيء كان يضايقني من دراستي إنو قراءاتي محصورة لمدة 5 سنوات في مجال التقنية وبلغة وحدة، الحين رجعت وبعنف لعادتي القديمة ولكوني دودة الكتب ، ومدمنة الكتب نوال القصيّر :].  في الـ 2009 صرت سنة ثالثة تدوين ! وحاسة إنو بلوقي ما قاعد يتقدم ولا قاعدة أنتج شي من اللي أبيه. والسبب ؟ الكسل ! يعني ستل مو أنا السبب :]
في الـ 2009 زادت طاقتي الإيجابية بشكل كبير رغم كل الظروف السلبية العامة، وهذا شي أشكر ربي عليه دائما و أبداً.

في الـ 2009 فقدنا عبد الله القصيّر (ولد خالي) بعد مرض عانى معاه بدون ما يقول لاحد حتى آخر شهرين في حياته 🙁 والحمد لله على كل شيء. سرطان عنيف في البطن ككل. الطحال و القولون و و و . الله يرحمك ياعبد الله ويجمعنا فيك بجناتك، هالدنيا ناقصتك وربي!
في الـ 2009 كانت سنة عالمية غير جيدة سواء على المستوى المحلي او العالمي، بداية بالتقلبات الجوية من غبار عنيف وآخرها كارثة جدة. ناهيك عن نشرات الأخبار اللي ما تاخذ منها غير الهم و الغم، وما استثني الأمراض اللي بدت فيها انفلونزا خنازير ومدري ايش! ونهاية بالاعتداء على الحدود الجنوبية. سنة مقلقة ! سنة مخوّفة، مايندرى سنة عقاب او ابتلاء. يارب ابتلاء.

على صعيد العلاقات الشخصية مافي شي تغير إلا أنو أهلي صرت أحبهم أكثر وأكثر، وصاحباتي نور ورشا ونوف وعروب صرت أحبهم أكثر وأكثر وأكثر وصرت أثق فيهم أكثر واكثر والحمد لله وماشاء الله : ) .وتاكدت أكثر إنو بسمة وإيمان و رزان وديمة وغالية هم من الكنوز اللي طلعت فيها من حياة الجامعة. تعرفت على صديقات جدد رائعين، بدأت تتقلص دائرة الغير مرغوب فيهم في حياتي الشخصية لأني خلاص اتخذت موقف مغاير وصرت أطنش واللي فهم فهم واللي مافهم بيفهم بعدين :].

رتبت غرفتي ياجماعة :] رتبت الحوسة اللي فوق ^ :] وتكللت العملية برضا أمي وابتسامة انشراح منها :] بس طبعا مدة بسيطة واكتشفت انو فيه حوسة جديدة لازم تترتب ألا وهي حوسة الكتب :] صار عندي أطنان من الكتب ( ناهيك عن كتب الجامعة اللي ماتقل صفحاتها عن 400 صفحة ). صارت ريحة الكتب زي الإدمان عندي، ومنظر الكتب متراكمة يعطيني شعور روحاني غريب ! رتبت الحوسة من جديد وصلحت مكتبتي اللي كانت عايشة ع البركة ومهجورة وقسمت الكتب فيها إلى تصنيفات.

البورد نعمة كبيرة من الله! ولذلك عندي 2 :] هو الوحيد اللي يخليني أكتب أهدافي بشكل واضح والتودو لست تكون قدامي كل ماقمت او نمت ! هالسنة لها نصيبها من تجديدات البورد :] ماتخلو من صور كتاكيتي جود ولينا وريما ونصيب كبير لورقة فيها أهدافي العامة والخاصة، و ورقة أسبوعية للمهام الواجب إنجازها.
أحد أهدافي قصيرة المدى واللي بديتها من 3 شهور يمكن إنو أساعد 100 شخص بدون ثمن للحين وصلت 73 شخص! يعني باقي تقريبا 27 شخص وأحقق هدفي ! ومره أشكر كل الأصدقاء بتوتر وفيس بوك اللي أعطوني مجال أساعدهم :). في هالسنة وخلال أيام قصيرة ان شاء الله راح نكون أنا وبسمة خالصين من جزء كبير من مشروع أكبر نسعى له بإذن الله و متحمسين له.  بسمة وإيمان و أنا رسمنا حدود و علامات مشروع جديد إن شاء الله ويارب يتم يارب يارب ! وأساسا متعة العمل مع هالشخصيتين تخليك تصر إنك تكمل المشاريع وتبدأ في غيرها .
ومن الاهداف لهالسنة برضو إنو أقرا في الـ 2010 وسنتي الجديدة :] 50 كتاب كحد أدنى  وبنشوف يانوال تنجحين بهالشيء أو لا. طبعا 50 كتاب ممتاز ومضمون كويس ومو روايات فارغة :] ولحد الحين 5 كتب والسادس بيدي. وطبعا ما يمنع إنو أرجع أعيد قراءة الكتب اللي قراتها سابقا وخصوصا من مدة طويلة. وتبعا لهالهدف اللي لازم ما تكون المنفعة فيه خاصة فيني انا بس قررت إنو كل شهر أنزل بلوق بملخص قراءاتي عشان الناس تستفيد وعشان برضو ما أهمل القراءة ويكون عندي شهريا حاجة ألخصها :].
فكرت برضو بعمل دفتر او journal مخصص لـ مراجعات الكتب مع اقتباساتها الأليمة بشكل كولاجي وفني وأشاركه مع الجميع <—هزؤوني عشان ما أتكسل عنه و أسويه :].

فيه هدف ما أبي تجي السنة الجاية وانا ما سويته 🙁 وأبي أحتفظ فيه لنفسي من باب : استعينوا على قضاء حوائجكم بالكتمان. عروب و نورو هدى أختي يعرفونه :] وإن شاء الله إنو أنا قدها وبسويه وبخلص منه وبتتسهل أموره.

في السنة اللي راحت حاجات جميلة وصلتني من صديقاتي الجميلات أولها عدسة كاميرا أليمة من أحسن صديقات بالكون ( طبعا يعني نور ورشا ونوف :] ). والشعور الجميل لمن تكون نايم ولمن تصحى وتشغل النور تلاقي على الكرسي كرتون أحمر بعدين ما تستوعب وشو هذا وتقعد بالسرير ربع ساعة تطالعه :] ، وتخمن إيش جواته! بعدين تقول أكيد أختي هدى جايبة لي أكل * مشكلة الجوعانين * ولمن تتكرم وتقوم من السرير تلاقي اسمك ع الكرتون 😐
بعدين تستوعب انو ( طرد ) من بريطانيا، ومن ورا مكتوب اسم صاحب الطرد . :”( ولمن تفتحه تلاقي شخص جميل ما قابلته ولا قابلك لكنه من طيبته يتذكرك زي شخص عشت معاه مدة طويلة. تلاقي شخص عنده قلب جميييل تذكرك بشيء إنت تحبه كثيير وأرسلك حاجات تهتم لها وتشوف فيها معاني كبيرة. شكرا شكرا يا شوكولا على أغراض الكرافتس الحلوة ! أتعب أقول شكرا يكفيني إنها منك وربي. الشعور الجميل الثاني تقولك إيمان ع القوقل توك إنو فيه لك وديعة من أيام الجامعة وإنو لازم ترجعها لي :/ وانا مره ما أتذكر إنو إيمان أخذت شي مني وما رجعته و لمن أخذتها :”( كنت فعلا محتاجة أبكي هذيك اللحظة لأنو اكتشفت إنو هالشيء هدية وقاعدة تموّه :] والهدية طبعا تبكي لعدة أسباب أولها إنو الهدية صارت من إيمان و بثينة الحكمي :”( البنت اللي دخلت قلبي بسرعة البرق ! ولانو الكتاب لأحد كتابي المفضلين واللي يكاد تكون كتبه نادرة الوجود هنا !
الشعور الفظيع رقم 3 إنو لمن تدخل غرفتك وترجع تلاقي الباب مقتوح وتقول : ايش هذا مايحترمون خصوصيتي ويفتحون باب غرفتي :she وتمشي في امان الله وتشوف قدامك كيس هدية وأشياء خطيرة وقسم كنت احسبه بالغلط وإنو لاختي الثانية ويبون رايي في الهدية :] <—ماتعودت :] بعدين أفتح الكيس تطلع هدية من أختي الخطيرة هدى والهدية شنطة برادا ألييييييمة ! وصرنا The Nawal wears Prada :] . الشعور المتألق رقم 4 إنو في يوم 12 ديسمبر تدخل وتلاقي على سريرك كتابين كنت تبيهم و واحد على وجه الخصوص كنت ميت تبيه :] بعدين تبدا تقول اااع ااااع هذول حقاتي والا وشو ؟ الا يجي أخوك العزيز الخطير ويقول ايه لك :] مبروك . شكرا لكل شيء حولي سلبي أو إيجابي ! شكرا لأهلي العظيمين شكرا لصديقاتي العظيمات، شكرا لكل شيء أضفتوه في السنوات اللي راحت والجاية بإذن الله. شكرا لكل من قال لي كلمة حلوة في بلوقي او كلمة سيئة الأكيد إنو استفدت منها بطريقة أو بأخرى. شكرا لكل اللي عاتبوا وسألوا عني فترة الانقطاع عن التدوين، صدق صدق انا اسفة لو طولت هالقد! مره انا اسفة كثير لو ما قدرت ارد عليكم كلكم بالفيس بوك أو توتر او بإيميلي. شكرا وربي لـ 36 شخص اللي مرسلين بالفيس بوك و اللي مارديت عليهم 🙁 مره اسفة بس وعدت نفسي ما أرد على أحد الا بلنك التدوينة الجديدة ! لاني رديت عى رسائل من قبل وتفشلت ما نزلت بلوق ولا شي 🙁 شكرا لأصدقائي الجدد الرائعين والكريمين : ) شكرا للشعور الجميل اللي يضيفونه لحياتي السعيدة . شكرا للناس المخلصة لبلوقي أكثر مني واللي تزور وتعلق وتتواجد دائما ! انتم السبب الأول بعد الله إنو انا مستمرة تدوين. شكرا لكل شيء للأشياء اللي راحت والأشياء اللي قاعدة تصير وللأشياء القادمة ، ممنونة كثير لكل تجربة جميلة ولكل تجربة سيئة ! وربي الحياة بكل جوانبها نعمة كبيرة وهبة من الله ! يارب قدرني وأعني أحافظ على هبتك ونعمك اللي اغرقتني فيها. شكرا لك أولا وأخيرا يا الله على كل الأشخاص الجميلين المحيطين فيني ، وعلى قدرة التطنيش والترفع في مرات كثيرة عن أي أحد سيء همه إنه يتكلم فيني بالسوء. شكرا لأنك وهبتني النور في حياتي، يارب لاتحرمني من هالنور واللي يقرا في آخرتنا. يارب أحبك واحب الحياة اللي وهبتني إياها. احب أهلي وأحب أصدقائي وأحب تفاصيلي. أحب وجودي وكياني! أحبك يارب ، يارب املئ قلبي بحبك. واللي يقرا يارب : )