البيز / قصة حياة

دائما يشدني البيز شكلا ومضمونا ً. وهو قطع من الأقمشة موصولة  بخيوط مع بعضها بطريقة فنية و ذوقية تساعد على مسك الأشياء الساخنة في المطبخ بالمقام الأول. جرت العاةد إنو يكون شكله: قطعة قماش ملونة أو مصحوبة بنقوش في الجهة الأمامية للبيز، وقطعة قماش سادة أو منقوشة برضو من الخلف. القطع هذي موصلة ببعضها بخيوط متينة ومرتبة. ويزين البيز بالقيطان على القطعة الأمامية غالبا كشكل جمالي متعارف عليه. ومن الداخل مبطنة بمزيد من الأقمشة لحفظ الحرارة. الشيء الحلو واللي يعجبني دائما هو الأطراف الخارجية للبيز :

زي ما نشوف عبار عن مثلثات تمت خياطتها في أطراف البيز للزينة. حتى صارت هالمثلثات هوية للبيز. البيز أقدر أعتبره قطعة فنية ورائها رؤية كبيرة ونظرة أعمق. البيز فن عمله أصحابه من غير مايعرفون إنو هذا الشيء فن ومتعة للناظر و المتذوق. النقوش و الأقمشة المختارة، الطرزات والألوان المنقتاة عشوائيا في البيز تشدني كثير. توليفات الأقمشة مع بعض سواء كانت منتقاة بعناية او بشكل عشوائي كلها تشدني، لمن أشوف البيز اللي قماشه من الأمام وردي ومن الخلف أزرق ، او من الأمام أحمر ومن الخلف بني بطريقة غريبة كلها ترجعني للماضي وبساطته .. للماضي اللي الاهتمام بالمظهر فيه أقل. ما ادري ليه أحس انو البيز من الأشياء اللي احتفظت بقيمتها على مر السنين واحتفظت بشكلها.. ما أحس إنو بيز إلا لمن يكون بهالشكل وبهالاختيار العشوائي وبخيوط القيطان. ما اشم فيه ريحة الماضي، ولا أشم فيه ريحة امرأة كبيرة في السن سهرت عليه تخيطه كتذكير للأيام الماضية وكـمصدر رزق، إلا لمن يوصلني بنفس الطريقة اللي ظهر فيها. و الأكيد: لمن يكون متطور أكثر ومعمول بعناية مصانع ما راح أحبه أو أطول اطالع فيه وأنسج منه ألف قصة وقصة. جاي على بالي أجلس مع وحدة تسويه بيدها واشوف كيف تبدا الحكاية وكيف تنتهي، أتخيل المثلثات تلخيص لحياة المرأة اللي عملته ! أتخيلها تمثل نقاط القوة والضعف، نقاط التحول في حياتها من اعلى لاسفل والعكس، نقاط المحبه والكره ، أشوف إنو تمثل المنعطفات اللي بحياتها وبحياتنا برضو! في البيز معاني كبيرة أكبر من عازل للحرارة. البيز يعلمني إنو الحياة مرات افضل تكون عشوائية ومو بتخطيط كبير ودقيق بس الأهم إننا ما نحيد عن الهدف الواضح اللي رسمناه لأنفسنا ( ويمثل هالشيء شكل البيز بالنهاية). البيز يقدم لي معنى بسيط جدا جدا للحياة: صلحها و جملها بنفسك وبأي طريقة تقدر عليها.

* عندنا ألف مساكة بأشكال جميلة وألوان روعة في المطبخ ، بس فعليا ونفسيا ما أقدر أستخدم إلا البيز. 🙂